Lengjudeildin: Vestri með sterkan sigur á Aftureldingu

Vestri vann frábæran sigur á Aftureldingu á Ísafirði í dag. Fyrri hálfleikurinn var bragðdaufur. Fyrsta skotið átti Elmar Atli Garðarson í upphafi seinni hálfleiks en Arnar Daði Jóhannesson í marki Aftureldingar varði.

Vestri hélt áfram að sækja og það skilaði sér með marki á 72. mínútu. Breki Þór Hermannsson fékk boltann inn á teignum og hann sendi á Emmanuel Duah sem skoraði með góðu skoti.

Afturelding fékk góð tækifæri undir lokin til að jafna metin en Breki Þór innsiglaði sigur Vestra með marki í uppbótatíma. Afturelding var komið með marga menn í sóknina, Breki komst einn í gegn og skoraði.

Vestri stökk upp fyrir Aftureldingu í 2. sæti með 19 stig en Afturelding er í 4. sæti með 16 stig. Afturelding hefur spilað tveimur leikjum minna en Vestri.