Aubameyang kominn til Marseille (Staðfest)

Aubameyang, sem er 34 ára gamall og gerir þriggja ára samning við Marseille, tekur á sig gríðarlega launalækkun til að skipta yfir í franska boltann. Hann var með tilboð á borðinu frá Sádí-Arabíu en hafði ekki áhuga á að flytja burt frá Evrópu.

Aubameyang var lengi einn af bestu framherjum fótboltaheimsins þar sem hann raðaði inn mörkum fyrir Borussia Dortmund og Arsenal áður en hann gekk í raðir Barcelona og hélt svo til Chelsea.

Auba var iðinn við markaskorun á hálfu ári hjá Börsungum, en þeir neyddust svo til að selja hann til Chelsea eftir gott kauptilboð síðasta haust.

Hann fann sig aldrei hjá Chelsea og hefur nú nýjan kafla á ferlinum. Hjá Marseille mun hann spila með öðrum reynslubolta sem heitir Alexis Sanchez.

Aubameyang er þriðji leikmaðurinn til að ganga í raðir Marseille í sumar eftir Renan Lodi og Geoffrey Kondogbia sem komu úr röðum Atletico Madrid.

Kaupverðið er óuppgefið en taldar eru miklar líkur á að Aubameyang hafi fengið að yfirgefa Chelsea á frjálsri sölu til að lækka launakostnaðinn hjá félaginu.