Islam Slimani til Mónakó á láni (Staðfest)

Mónakó hefur fengið framherjann Islam Slimani á láni frá Leicester út tímabilið.

Mónakó hefur einnig tryggt sér forkaupsrétt á leikmanninum næsta sumar.

Hinn 31 árs gamli Slimani kom til Leicester frá Sporting Lisabon á 28 milljónir punda árið 2016 en þá varð hann dýrastur í sögu Leicester.

Slimani hefur gengið illa að festa sig í sessi hjá Leicester en hann hefur skorað átta mörk í 35 deildarleikjum.

Á síðasta tímabili var Alsíringurinn á láni hjá Fenerbahce í Tyrklandi en hann var einnig á láni hjá Newcastle síðari hluta tímabils 2017/2018.