Lestu um leikinn: KR 2 -  2 Vestri

„Mér fannst við gera meira en nóg til að vinna þennan leik. Þegar þú ert í þessari stöðu þá þarftu stundum að gera miklu meira til að fá þrjú stig," sagði Óskar.

„Mér fannst fyrri hálfleikurinn framúrskarandi vel spilaður og bara eitt lið á vellinum. Því miður náum við ekki að koma yfirburðunum í fleiri mörk. Í seinni hálfleik jafnast þetta aðeins út en mér fannst við með tök á leiknum stærstan hluta."

„Það er ekki auðvelt að spila á KR-vellinum eins og hann er í dag. Hann er orðinn mjög lúinn eftir sumarið. Mér fannst við á köflum spila mjög góðan fótbolta, baráttan í liðinu var góð og karakterinn góður. Það er hellingur sem við getum tekið með okkur í næstu leiki."

KR ætlar að leggja gervigras á aðalvöll sinn. Talað er um að framkvæmdir hefjist mögulega í vikunni og því var þetta kannski síðasti grasleikurinn á heimavelli KR.

„Það verður einhver annar að svara því. Hluti af vandamáli okkar er algjört aðstöðuleysi. Það hefur verið gríðarlegt álag á grasvöllunum okkar og aðalvöllurinn fengið að finna fyrir því. Hvort þetta hafi verið síðasti heimaleikurinn á grasi verður að koma í ljós."

Ef vinnuvélarnar mæta, hvar spilar KR þá næsta heimaleik?

„Ég get ekki hugsað það langt. Það er fullt af góðum völlum á höfuðborgarsvæðinu. Við spiluðum leik í sumar á AVIS-vellinum (heimavelli Þróttar) og held að það hafi verið ánægja með það. Það er of snemmt að hugsa um það. Fáum vinnuvélarnar fyrst áður en við hugsum um það hvar við spilum næsta heimaleik."

Hægt er að sjá viðtalið í heild í sjónvarpinu hér að ofan en þar tjáir Óskar sig nánar um komandi verkefni KR í fallbaráttunni og blæs á sögusagnirnar um að Frederik Schram sé að mæta í Vesturbæinn.