Wolves tók á móti Liverpool, toppliði ensku úrvalsdeildarinnar, í dag og lenti undir eftir 8 mínútur. Jordan Henderson skoraði þá með skalla eftir hornspyrnu frá Trent Alexander-Arnold.

Eftir um hálftíma af leiknum þurfti Sadio Mane að fara meiddur af velli og kom Takumi Minamino inn í hans stað. Meira var ekki skorað fyrir leikhlé.

Raul Jimenez jafnaði fyrir heimamenn í upphafi síðari hálfleiks. Hann skoraði með skalla eftir góða skyndisókn. Adama Traore gaf frábæra fyrirgjöf sem rataði beint á koll Jimenez.

Bæði lið komust nálægt því að taka forystuna eftir jöfnunarmarkið en það var ekki fyrr en á 84. mínútu sem næsta mark leit dagsins ljós. Nú var það Roberto Firmino sem skoraði með óverjandi skoti úr teignum eftir sendingu frá Henderson.

Meira var ekki skorað og hafði Liverpool betur í spennandi leik. Liverpool er komið í 16 stiga forystu á toppinum, með leik til góða. Úlfarnir eru í sjöunda sæti, jafnir Tottenham og Manchester United á stigum.

Það virðist lítið sem ekkert getað stöðvað Liverpool um þessar mundir. Liðið getur komist í 19 stiga forystu með sigri á útivelli gegn West Ham næsta miðvikudag.

Til gamans má geta að þetta er fyrsta deildarmark sem Alisson fær á sig í tvo mánuði, eða síðan í 1-2 sigri gegn Crystal Palace 23. nóvember.