Grikkland: PAOK tapaði toppslagnum

Sverrir Ingi Ingason lék allan leikinn í hjarta varnarinnar er PAOK tók á móti Olympiakos í toppslag grísku deildarinnar.

Fyrri hálfleikur var mjög bragðdaufur og litu aðeins þrjár marktilraunir dagsins ljós en engin þeirra fór á rammann.

Dimitris Giannoulis varð fyrir því óláni að setja knöttinn í eigið net í upphafi síðari hálfleiks en við það skiptu heimamenn um gír og byrjuðu að skapa sér fín færi.

Boltinn rataði þó ekki í netið og héldu gestirnir út. Olympiakos er með fimm stiga forystu á toppinum.