„Það var þriðjungur búinn á mótinu hjá Fylki. Sjötti leikurinn var í gangi, ég sat á bekknum og var í Grindavík í ógeðslegu veðri. Ég var að telja mínúturnar sem ég hafði spilað í byrjun móts, þær náðu ekki tíu mínútum."

„Ég taldi líka tímann sem ég hafði varið í að hita upp og það voru næstum því tveir tímar. Ég kom ekki inn á í þessum leik og man að í rútunni á leiðinni heim ákvað ég að ég gæti ekki verið að eyða tíma í þetta. Ég var smátt og smátt að missa áhugann á þessu og ég átti von á barni á þessum tíma. Ég hugsaði að þetta væri komið fínt og ákvað bara að hætta," sagði Davíð.

„Ég hætti í Fylki - það er mjög fyndið að segja frá þessu - ég man að ég er í vinnunni og ég man að Fótbolti.net kemur með grein um að ég sé hættur. Ég er ekki að djóka, það liðu svona fimm mínútur og þá fæ ég SMS frá Davíð Smára (þjálfara Kórdrengja), alveg langloku. Þetta var alveg það langt SMS að hann hefur örugglega verið fimm mínútur að skrifa það. Hann hefur bara tekið upp símann um leið og hann sá fyrirsögnina. Hann spurði hvort ég hefði einhvern áhuga á þessu og ég sagðist ætla að hugsa þetta."

Davíð Smári hringdi í kjölfarið reglulega í nafna sinn.

„Á endanum nær hann að sannfæra mig, mér leist bara fáránlega vel á þetta verkefni sem hann lýsti. Ég ákvað að taka slaginn með honum," sagði Davíð Þór.

Hann lék 41 deildarleik með Kórdrengjum og skoraði þrettán mörk. Hann hjálpaði liðinu að fara upp úr 3. deildinni á fyrsta tímabili félagsins í þeirri deild og upp úr 2. deild tímabilið 2020.

Hægt er að hlusta á viðtalið við Davíð Þór hér að neðan.