Færeyski sóknarmaðurinn Martin Klein hefur skrifað undir samning við Lengjudeildarfélag Njarðvíkur sem gildir til næstu tveggja ára.
Martin er 23 ára gamall og kemur frá Víkingi í Götu.
Í Færeyjum hefur Martin leikið samtals 155 leiki og skorað í þeim 82 mörk. En 75 þessara leikja og 35 mörk hafa komið í efstu deild þar sem hann var nú síðast m.a. valinn leikmaður septembermánaðar fyrir góða frammistöðu sína með Víkingum sem sitja í 2. sæti færeysku Betri deildarinnar.
Á þessu tímabili hefur Martin skorað 16 mörk í 25 leikjum og er þriðji markahæsti leikmaður úrvalsdeildarinnar þar í landi.
„Sannarlega er um spennandi leikmann að ræða sem verður virkilega gaman að sjá í grænu treyjunni á komandi tímabili. Knattspyrnudeildin býður Martin Klein hjartanlega velkominn til Njarðvíkur!" segir í tilkynningu Njarðvíkur.
Njarðvík hélt sér uppi í Lengjudeildinni á liðnu tímabili og Gunnar Heiðar Þorvaldsson framlengdi samning um þjálfun liðsins.
Athugasemdir