Franck Kessie, miðjumaður AC Milan á Ítalíu, missti tönn eftir að hafa fengið olnbogaskot frá Matteo Politano í 3-1 sigrinum á Napoli í gær.
Zlatan Ibrahimovic skoraði tvö í leiknum gegn Napoli og þá bætti Jens Petter Hauge við þriðja markinu undir lokin.
Kessie spilaði á miðjunni í leiknum en hann fékk hressilegt olnbogaskot frá Politano í fyrri hálfleiknum.
Samkvæmt Milan TV missti Kessie tönn við þessi viðskipti og þurfti læknalið að huga að honum. Hann kláraði hins vegar leikinn og fór síðan til tannlæknis daginn eftir til að gera við tönnina.
Kessie hefur spilað 14 leiki og skorað 2 mörk í öllum keppnum með Milan á tímabilinu.
Athugasemdir