Svæði sem Blikar herjuðu á gegn KR

Anton var spurður út í mörkin í fyrri hálfleiknum.

„Þarna er augljóslega hægt að meiða KR-ingana, fyrsta markið er eins og teiknað á töflu: út fyrir, bolti í kanalinn og svo í fyrsta á Kristófer sem var á undan Finni. Það gekk bara mjög vel."

„Fínt dagsverk hjá mér, það voru allir að leggja í púkkið. Það skiptir máli að sem flestir taki þátt í markaskoruninni okkar."

Anton átti sérlega glæsilega stoðsendingu á Ívar Örn Árnason.

„Já, hún var góð. Ég vissi að ég myndi koma með boltann fljótt inn á teiginn þá voru KR-ingarnir seinir að skila sér í 'cutback zone-ið'. Það var einhver eðlishvöt í mér að gera það," sagði Anton Logi við Fótbolta.net.

„Við ætluðum að fara mikið aftur fyrir þá, utan á Akoto og Gabríel (varnarmenn KR). Aron Bjarna gerði það mjög vel í markinu mínu, ég kom í seinni bylgjunni í 'cutback zone-inu' sem við vissum að þeir hafa verið að ströggla með og kláraði vel," sagði Anton Logi um markið sitt í viðtalinu við RÚV.

Í ræðu Ólafs Inga Skúlasonar, þjálfara Breiðabliks, í hálfleik var einnig minnst á 'cutback' og sagði hann að það væri alltaf opið.

Þegar menn komast í svæðin við endalínu inn á vítateignum, sitthvoru megin við markteiginn, eru menn komnir í 'cutback' svæði. Þangað vilja menn gjarnan komast og gefa svo boltann fyrir eða út í teiginn; yfirleitt þá í dauðafæri fyrir samherjana.



Var að glíma við meiðsli í viðbeini
Anton Logi glímdi við erfið meiðsli síðustu 7-8 mánuði en er að kominn á fullt. Hann spilaði í gegnum meiðslin til að byrja með en hætti því svo. Í vetur fékk hann aðstoð frá sjúkraþjálfara á Írlandi.

„Staðan á mér er bara góð, ég er að komast hægt og rólega í gott stand, mér líður allavega mjög vel í líkamanum, er ekkert verkjaður, en er búinn að vera lengi frá og var náttúrulega ekkert með á undirbúningstímablinu. Við erum búnir að gera vel í að koma mér í stand, trappa mig upp og núna er ég að verða nokkuð 'fit'. Ég var að glíma við beinbjúg í lífbeininu og verki þar í kring, niður í vinstri nárann og upp í kviðinn. Við ákváðum að fara aðrar leiðir en að fara í aðgerð og það er sem betur fer að virka núna," sagði Anton Logi við Fótbolti.net. Hann talaði um beinbjúg í viðtalinu en hann fór líka í aðgerð vegna meiðsla á öxl í desember. Hin meiðslin héldu honum frá í lengri tíma.