Þýskaland: Frankfurt skoraði þrjú í Berlín

Hertha Berlin tók á móti Eintracht Frankfurt í fyrsta leik 2. umferðar þýska úrvalsdeildartímabilsins.

Gestirnir frá Frankfurt voru betri í fyrri hálfleik og skoraði Andre Silva fyrsta mark leiksins úr vítaspyrnu. Bas Dost tvöfaldaði forystu Frankfurt og gerðu heimamenn þrefalda skiptingu í hálfleik.

Hertha tók völdin á vellinum en náði ekki að koma knettinum í netið og gerði Sebastian Röde út um viðureignina með marki á 71. mínútu. Staðan orðin 0-3.

Martin Hinteregger varð fyrir því óláni að setja boltann í eigið net á 78. mínútu og verðskulduðu heimamenn að skora mark eftir góða frammistöðu í síðari hálfleik.

Nær komust þeir þó ekki og lokatölur 1-3. Frankfurt er með fjögur stig eftir sigurinn og Hertha með þrjú.