Það sauð allt uppúr eftir leik 3 - 1 sigur Breiðabliks á Víkingi í gær en eftir handaband milli þjálfaranna við lokaflautið sagði Óskar Hrafn Þorvaldsson þjálfari Breiðabliks eitthvað við Arnar Gunnlaugsson þjálfara Víkings sem brást reiður við en neðst í þessari frétt er smá syrpa af þessu.
Lestu um leikinn: Breiðablik 3 - 1 Víkingur R.
Arnar vildi ekki ræða við Fótbolta.net eftir leikinn en Óskar Hrafn kom í viðtal og var spurður út í hvað gekk þarna á?
„Ég sagði bara skoðun mína á ummælum hans fyrir leik og hann var ósáttur við það og ekkert mál. Menn hafa verið reiðari við mig heldur en þetta," sagði Óskar Hrafn spurður út í uppákomuna.
Ummælin sem Óskar Hrafn lét fara í taugarnar á sér sagði Arnar í beinni útsendingu við Stöð 2 Sport skömmu fyrir leikinn.
„Ég verð að viðurkenna það að mér finnst rosalega erfitt að átta mig á þessu Blikaliði í dag. Þeir eiga góðar frammistöður inn á milli en hafa tapað óheyrilega mikið af leikjum í sumar. Þeir hafa tapað tólf leikjum í deild, bikar og Evrópu sem er held ég meira en Víkingur hefur tapað á þremur árum," sagði Arnar fyrir leikinn.
„Vanalega þegar þú tapar svona mörgum leikjum á einu tímabili þá ertu ekki með rosalega mikið sjálfstraust en einhverra hluta vegna er verið að spinna söguna þannig að liðið lítur út fyrir að vera með bullandi sjálfstraust. Það er hættulegt fyrir mig ef þeir trúa því. Þeir eru með hörkulið og við þurfum að brjóta þá á bak aftur eins og við höfum gert í sumar."
Óskar Hrafn var líka spurður út í ummæli Arnars sérstaklega og sagði þá.
„Partur af mér langar ekki til að taka þátt í þessum sandkassaleik sem hann er að búa til. Þessum barnalega samanburði. Mér finnst rosalega mikið snúast um það hjá Víkingum og Arnari að telja titla og láta vita hvað þeir eru búnir að vinna marga leiki og titla. Þeir þurfa ekkert að gera það, þetta er flott lið. Það er oft þannig að það er sérstakt hvað menn tala mikið um að þeir séu eitt af bestu liðum sögunnar og hvað þeir eru búnir að vinna marga titla. Það vita það allir og þarf ekki að segja það. Þeim sem finnst þeir þurfa að segja hlutina svona oft, það er kannski eitthvað annað sem er að hrjá þá. Þetta er bara eins og þetta er," sagði Óskar og hélt áfram.
„Hann er bara sár, ég talaði um það fyrir leikinn í Víkinni að þeir væru bara búnir að vinna eitt einvígi í Evrópu og ég er ekki viss um að þeir hafi unnið á útivelli í Evrópu. Þeir hafa alltaf talið sig mikið Evrópulið og sterkir í Evrópu. Ég geri ráð fyrir að hann hafi verið að svara því, það er bara í lagi og bara flott. Góður banter myndi einhver segja en auðvitað hefur myndast rígur á milli þessara liða. Ég veit ekki hvort hann er heilbrigður eða hvort hann er kominn einhvern veginn út fyrir það sem eðlilegt getur talist. Þú heyri söngvanna úr stúkunni Víkings megin. Það er ekki mitt að dæma um það en vissulega er lítil ást á milli þessara liða og það er mín tilfinning að hún muni fara hverfandi á næstu vikum, mánuðum og árum og verði síðan engin."
