Emile Smith Rowe, sóknartengiliður Arsenal, hefur ekki fengið mikinn spiltíma á leiktíðinni eftir að hafa verið mikilvægur hlekkur á síðustu leiktíð, með 10 mörk í 33 úrvalsdeildarleikjum.
Hann lenti í erfiðum meiðslum á upphafi tímabilsins en er núna búinn að ná fullum bata og vonast til að fá spiltíma á lokakaflanum.
„Ég vil bara spila fótbolta. Liðið er að gera frábæra hluti og ég þrái að vera partur af því. Ég verð að halda mér í góðu formi svo ég verði tilbúinn í slaginn þegar stjórinn þarf á mér að halda," segir Smith Rowe, sem fékk aðeins að spila átta mínútur gegn Crystal Palace í síðustu umferð eftir að hafa verið ónotaður varamaður tvo leiki þar á undan.
Smith Rowe var í byrjunarliði U21 landsliðs Englands sem vann Frakklan 4-0 í vináttuleik í landsleikjahlénu. Hann skoraði í leiknum og var það hans fyrsta mark síðan í júní.
Leikmaðurinn fékk einnig að spila 50 mínútur í frábærum 3-2 endurkomusigri gegn Bournemouth á dögunum þar sem hann lagði upp eitt marka Arsenal.