Spá Fótbolta.net fyrir Bestu deildina: 9. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. Fram, 58 stig
10. Afturelding, 37 stig
11. Vestri, 27 stig
12. ÍBV, 14 stig

Um liðið: Fram hefur fest sig í sessi á nýjan leik í Bestu deildinni. Þetta er fjórða tímabilið í röð í deild þeirra bestu eftir alltof langa veru í næst efstu deild. Núna er Fram á þeim stað þar sem félagið á að vera. Það hefur verið mikill uppgangur í Fram og aðstaðan í Úlfarsárdalnum, sem er hverfi á mikilli uppleið, er til fyrirmyndar. Tilfinningin er sú að það eru bjartir tímar framundan í Dal draumanna en núna er draumurinn hjá liðinu að komast í efri hlutann. Þeir voru ekki langt frá því í fyrra og spurning hvort það takist í þetta skiptið?

Þjálfarinn: Það vakti mikla athygli fyrir tímabilið í fyrra þegar Rúnar Kristinsson var ráðinn þjálfari Fram og Helgi Sigurðsson, fyrrum markakóngur í Fram, ráðinn honum til aðstoðar. Rúnar er goðsögn hjá KR, bæði sem leikmaður og þjálfari. Sem þjálfari þá gerði hann KR-inga þrisvar að Íslandsmeisturum og þrisvar að bikarmeisturum. Fótboltaáhugamenn þurftu svo sannarlega að venjast því að sjá Rúnar í Fram-úlpu en Rúnar hefur haft góð áhrif inn í Fram og bætt starfið. Það fer af honum gott orðspor innan Fram-heimilsins og ef einhver að fara að ná því mesta út úr þessu liði, þá er það líklega hann.

Styrkleikar: Fram er með einn sigursælasta þjálfara landsins í brúnni. Rúnar hefur afrekað ótrúlega hluti í íslenskum fótbolta og veit hvað þarf til að ná árangri. Það er mikill styrkleiki fyrir Fram að vera með hann sem þjálfara. Eftir að hann tók við, þá varð Fram mun sterkara varnarlið og þegar allir voru með í fyrra, þá var gríðarlega erfitt að brjóta þá á bak aftur. Kennie Chopart, Kyle McLagan og Þorri Stefán Þorbjörnsson léku allir frábærlega í hjarta varnarinnar. Aðstaðan er frábær hjá félaginu og í Úlfarsárdalnum eru tækifæri fyrir Fram til að koma sér aftur á toppinn í íslenskum fótbolta á næstu árum.

Veikleikar: Varnarleikurinn varð sterkari í fyrra, en það hafði áhrif á sóknarleikurinn. Þeir þurfa að finna svona aðeins meira jafnvægi ef svo má segja. Guðmundur Magnússon skoraði sex mörk og var hann langmarkahæstur í liðinu þegar deildin skiptist. Ef Fram ætlar sér að vera í efri hlutanum þá þarf Gummi helst að skora meira og aðrir í kringum hann þurfa að leggja meira í púkkið. Fram endaði síðasta tímabil illa og misstu svolítið hausinn sem var ekki gott að sjá. Breiddin var ekki alveg nægilega góð hjá liðinu í fyrra en hún virðist vera orðin betri fyrir komandi keppnistímabil.

Lykilmenn: Kennie Chopart og Fred
Kennie fylgdi Rúnari til Fram eftir að hafa spilað undir hans stjórn í mörg ár hjá KR. Kennie hefur lengi spilað á Íslandi en hann kom fyrst hingað sem sóknarmaður, færðist svo í bakvörðinn og er núna orðinn miðvörður hjá Fram. Hann var límið í liðinu í fyrra og þegar hann var utan vallar, þá lenti liðið oft í vandræðum. Hann er Frömurum mjög mikilvægur. Þá þarf Fred að vera kryddið í sóknarleiknum. Hann er með gríðarlega hæfileika og getur búið til færi upp á sitt einsdæmi.

Gaman að fylgjast með: Vuk Oskar Dimitrijevic
Fann sig ekki í Kaplakrika. Hann átti sín augnablik þar en þau voru ekki nægilega mörg, ekki nægilega stöðug. Það var eftirtektarvert að fylgjast með Vuk þegar hann var að koma upp hjá Leikni á sínum tíma en síðan þá hefur hægst á ferli hans. Hæfileikarnir eru klárlega til staðar og það verður ótrúlega áhugavert að sjá hvort að hann nái að blómstra í nýju umhverfi.

Spurningamerkin: Nær Fram að komast í efri hlutann frekar en að sogast í fallbaráttu? Hvernig verða allir nýju leikmennirnir? Nær Vuk að blómstra?

Völlurinn: Það eru liðin nokkur ár síðan Fram færði sig yfir í Úlfarsárdalinn og það hefur reynst mikið happaskref fyrir félagið. Heimavöllur liðsins er gríðarlega flottur og þar er alltaf tekið vel á móti manni. Lambhagavöllurinn stendur alltaf fyrir sínu.

Komnir:
Simon Tibbling frá Noregi
Isra Garcia frá Spáni
Vuk Oskar Dimitrijevic frá FH
Róbert Hauksson frá Leikni
Viktor Freyr Sigurðsson frá Leikni
Sigurjón Rúnarsson frá Grindavík
Óliver Elís Hlynsson frá ÍR
Kristófer Konráðsson frá Grindavík
Arnar Daníel Aðalsteinsson frá Gróttu
Jakob Byström frá Svíþjóð

Farnir:
Orri Sigurjónsson í Þór
Brynjar Gauti Guðjónsson í Fjölni
Tiago til Kína
Markús Páll Ellertsson til Ítalíu
Jannik Pohl til Þýskalands
Djenairo Daniels
Gustav Dahl til Danmerkur
Hlynur Atli Magnússon hættur
Sigfús Árni Guðmundsson á láni í Þrótt R.
Stefán Þór Hannesson í Hamar
Óskar Jónsson



Leikmannalisti:
1. Ólafur Íshólm Ólafsson (m)
12. Viktor Freyr Sigurðsson (m)
2. Kristófer Konráðsson
3. Þorri Stefán Þorbjörnsson
5. Kyle McLagan
7. Guðmundur Magnússon
8. Haraldur Einar Ásgrímsson
9. Róbert Hauksson
10. Fred Saraiva
11. Magnús Þórðarson
15. Jakub Byström
16. Isra Garcia
17. Adam Örn Arnarson
19. Kennie Chopart
20. Egill Otti Vilhjálmsson
23. Már Ægisson
25. Freyr Sigurðsson
26. Sigurjón Rúnarsson
29. Vuk Oskar Dimitrijevic
32. Hlynur Örn Andrason
71. Alex Freyr Elísson
Simon Tibbling
Óliver Elís Hlynsson
Arnar Daníel Aðalsteinsson

Fyrstu fimm leikir Fram:
6. apríl, Fram - ÍA (Lambhagavöllurinn)
13. apríl, Fram - Breiðablik (Lambhagavöllurinn)
24. apríl, ÍBV - Fram (Hásteinsvöllur)
28. apríl, Fram - Afturelding (Lambhagavöllurinn)
5. maí, Víkingur R. - Fram (Víkingsvöllur)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.