England: Villa ekki í vandræðum með Fulham

Gestirnir byrjuðu leikinn mun betur og fyrirliði þeirra, Jack Grealish, kom þeim yfir strax á fjórðu mínútu. Hann fékk þá flotta sendingu frá John McGinn inn fyrir vörn Fulham og kláraði færið vel á nærstöngina.

Ellefu mínútum síðar var Conor Hourihane á ferðinni. Hann skoraði þá eftir laglegt spil hjá Villa. Grealish fann McGinn sem lagði boltann út á Hourihane sem skaut í fyrsta og skoraði framhjá Areola í markinu. Tvær stoðsendingar hjá McGinn í dag.

Staðan var 2-0 í hálfleik og í byrjun síðari hálfleiks kom þriðja markið. Tyrone Mings skoraði þá eftir aukaspyrnu frá Hourihane. Bobby Reid skoraði fyrir Fulham stuttu síðar en markið var dæmt af eftir að VAR fann brot í aðdraganda marksins.

Meira var ekki skorað í leiknum og góður sigur Villa staðreynd. Fulham er búið að tapa þremur fyrstu leikjum sínum en Aston Villa hefur spilað tvo leiki, unnið báða og enn ekki fengið á sig mark.