England: Watford skellti Liverpool - Sarr hetjan

Fallbaráttulið Watford tók á móti Liverpool í síðasta leik dagsins í enska boltanum.

Gestirnir virkuðu slappir og voru heppnir að lenda ekki undir á síðustu sekúndum fyrri hálfleiks, þegar Troy Deeney klúðraði tvisvar sinnum úr dauðafæri.

Ismaila Sarr kom heimamönnum yfir í upphafi síðari hálfleiks. Hann hafði betur í baráttunni við Andy Robertson og skoraði eftir fyrirgjöf frá Abdoulaye Doucoure.

Sarr tvöfaldaði forystuna skömmu síðar eftir frábæran undirbúning frá Will Hughes og Troy Deeney og kom þriðja markið á 72. mínútu. Sarr komst þá í sendingu í vörn Liverpool og gaf boltann á Deeney sem skoraði laglegt mark.

Sarr komst nálægt því að fullkomna þrennuna en meira var ekki skorað og fyllilega verðskuldaður sigur Watford staðreynd.

Þetta er fyrsta deildartap Liverpool á tímabilinu en lærisveinar Jürgen Klopp eru enn með ótrúlega forystu á toppi deildarinnar.

Watford komst upp úr fallsæti með sigrinum, þar sem liðið er jafnt Bournemouth og West Ham með 27 stig eftir 28 umferðir.