ÍR tók á móti Vestra í 7. umferð Lengjudeildar karla í dag. Fótbolti.net ræddi við Jóhann Birni, þjálfara ÍR eftir leikinn.
Lestu um leikinn: ÍR 0 - 1 Vestri
„Þetta var ótrúlega svekkjandi tap. Ef maður súmmerar þennan leik upp þá mætum við ekki til að halda hreinu, það er ljóst, við mætum til að sækja sigurinn og erum nánast með boltann allan leikinn. Þeir bakka bara og breaka á okkur og þurfa varla að skapa sér færi til að vinna okkur 0-1.''
ÍR voru töluvert meira með boltann í dag en tapa samt sem áður 0-1. Hvað fannst Jóhanni það helsta sem vantaði upp á hjá sínum mönnum?
„Við erum að skapa okkur margar góðar stöður en síðan kemur bara síðasta sendingin og hún er ekki nógu góð. Það sem er að tapa þessum leik, bæði hér í dag og gegn Ægi, er það að við erum búnir að vera alveg ömurlegir í lykilmómentum leiksins, fyrir framan okkar eigið mark og svo fyrir framan mark andstæðinganna. Það vantar bara þetta drápseðli í okkur og það er það sem maður er mest svekktur með.''
Nú eru Breiðhyltingarnir búnir að leika 7 leiki og eru einungis með 7 stig. Hvernig metur Jóhann þessa byrjun í mótinu?
„Frammistöðulega séð hefur byrjunin verið fín en stigalega séð hefur hún ekki verið góð. Svo vantar bara að það sé smá töggur í manni og að við þorum að vinna leikina. Það eru allir leikir mikilvægir í þessari deild og við erum bara að sogast í fallbaráttu og það er grafalvarlegt fyrir okkur.''
