Fyrrum kanslari Þýskalands sendir Kompany hlýja kveðju - „Ég þekki þetta sjálf“

Kompany hneig niður á æfingasvæði Bæjara í síðustu viku og var fluttur með hraði á sjúkrahús þar sem hann gekkst undir rannsóknir næstu daga.

Nokkrum dögum áður hafði hann glímt við veirusýkingu og rétt náð sér fyrir leik Bayern gegn Arsenal í Meistaradeildinni.

Þýskir fjölmiðlar hafa haldið því fram að Kompany hafi verið farinn að bogna undan álaginu og þeim miklu kröfum sem hann gerir til sjálfs sín. Hann hafi meðal annars átt margar svefnlausar nætur þar sem hann hefur legið yfir æfingum, greiningum á mótherjum og öðru sem fylgir starfinu.

Merkel, sem var kanslari Þýskalands frá 2005 til 2021, ber mikla virðingu fyrir Kompany og vonast til að hann nái sér sem fyrst.

„Ég varð fyrst og fremst mjög leið þegar ég heyrði hvað hafði komið fyrir hann. Ég óska honum skjóts bata og vona að hann hafi í kringum sig fólk sem gefur honum það svigrúm og þann tíma sem hann þarf til að jafna sig, án nokkurrar pressu. Ég þekki sjálf hvernig það er að þurfa slíkan tíma.“

„Ég ber mikla virðingu fyrir störfum Vincent Kompany og afstöðu hans gegn fordómum og í öðrum mikilvægum málefnum. Ég get líka vel ímyndað mér að ef ég væri fótboltamaður, hvort sem ég væri karl eða kona, þá væri hann einmitt sú tegund þjálfara sem ég myndi vilja vinna með,“ sagði Merkel.

Merkel lenti sjálf í óþægilegu atviki árið 2019 þegar hún tók þátt í sérstakri athöfn á vegum þýska hersins og byrjaði skyndilega að skjálfa. Hún hefur tengt atvikið við mikið álag og möguleg áhrif fráfalls móður sinnar, auk þess sem hún var farin að undirbúa starfslok sín sem kanslari.

„Kompany tók ekki sjálfur ákvörðun um að vera heima og hvíla sig. Það þurfti eitthvað að gerast áður en líkaminn sendi honum skýr skilaboð um að nú væri komið nóg og hann þyrfti að stoppa. Nákvæmlega það sama gerðist fyrir mig,“ sagði Merkel í lokin.