„Eftir á að hyggja er það tíu, miðað við hvernig þetta þróaðist. Þetta var það besta sem maður gat ímyndað sér. Maður fékk tíma til að komast inn í þetta og svo spilaði ég alla leiki eftir það. Ég náði að skora og liðið hélt sér uppi," sagði Alfreð við Fótbolta.net fyrir æfingu hjá íslenska landsliðinu í dag en hann kann vel við sig í Bundesligunni.

„Ég held að ég hafi fundið að þetta er deildin sem hentar mér best. Þetta er deild sem ég horfði mikið til þegar ég var í Hollandi og langaði að fara þangað. Það var ekki hægt þá af öðrum ástæðum. Ég sé mig í þessari deild næstu árin."

Alfreð kom fyrst á láni til Augsburg en þýska félagið keypti hann í sínar raðir á dögunum.

„Þetta er fyrsta sumarið í langan tíma þar sem maður þarf ekki að hafa neinar áhyggjur af framtíðinni. Það er gott fyrir mann sjálfan að vita hvað maður er að fara að gera. Síðan ég fór út hefur bara verið eitt annað sumar þar sem hefur ekki verið nein óvissu."

Alfreð stefnir á sæti í byrjunarliðinu eftir góða frammistöðu undanfarna mánuði.

„Ég kem til landsliðsins með sama hugarfari og alltaf og það er að hafa áhrif. Núna höfum við 2-3 vikur fram að fyrsta leik til að sýna hvað maður getur og síðan er þetta ákvörðun þjálfaranna."

„Ég er í mjög góðu leikformi. Ég er búinn að spila í þýsku deildinni sem er krefjandi deild og ég held að ég hafi sjaldan verið í betra formi líkamlega."

Hér að ofan má sjá viðtalið í heild sinni.