Kolbeinn Sigþórsson, framherji íslenska landsliðsins, var að vonum svekktur eftir 2-2 jafntefli liðsins gegn Lettlandi í undankeppni EM 2016 á Laugardalsvelli í dag.
Kolbeinn, sem bar fyrirliðabandið í dag í fjarveru Arons Einars Gunnarssonar, kom Íslandi yfir strax á 5. mínútu og Gylfi Þór Sigurðsson bætti við marki. Lettar jöfnuðu hins vegar metin með tveimur mörkum í seinni hálfleik.
Kolbeinn, sem bar fyrirliðabandið í dag í fjarveru Arons Einars Gunnarssonar, kom Íslandi yfir strax á 5. mínútu og Gylfi Þór Sigurðsson bætti við marki. Lettar jöfnuðu hins vegar metin með tveimur mörkum í seinni hálfleik.
Lestu um leikinn: Ísland 2 - 2 Lettland
„Við vorum góðir í fyrri hálfleik og vorum að spila frábæran fótbolta, skapa færi en líka gefa nokkra sénsa. Lettar fengu nokkur ágætis færi og nýttu sér það ekki, og við vildum loka á þessi færi í seinni hálfleik. En þeir fengu sín færi og nýttu þau vel, það var erfitt að komast í gang eftir það. Það vantaði pínu upp á þetta hjá okkur í dag," sagði Kolbeinn við Fótbolta.net eftir leikinn.
„Við vorum kannski of djarfir sóknarlega. Stundum þegar við vorum að taka hlaupin voru bakverðirnir og kantmennirnir komnir báðir í hlaupin sem "strikerinn" tekur. Það segir kannski að við ætluðum okkur of mikið í dag. Við náðum bara ekki að byggja ofan á fyrri hálfleik þó hann hafi verið mjög góður."
Kolbeinn segist vera stoltur af því að hafa fengið að vera fyrirliði í dag.
„Það er frábær heiður að fá að bera bandið og svekkjandi að ná ekki að klára það með sigri í dag," sagði Kolbeinn, sem varð jafnframt næst markahæsti leikmaður landsliðsins í sögunni með marki sínu í dag.
„Ég er líka mjög stoltur af því, það er frábær áfangi fyrir mig að geta verið mikilvægur fyrir landsliðið. Ég næ vonandi að skora enn fleiri mörk fyrir Ísland," segir Kolbeinn, en hann er nú sjö mörkum frá Eiði Smára Guðjohnsen.
„Ég vona bara að Eiður skori fleiri mörk. Hann er frábær leikmaður og frábær gæi og við viljum honum allir vel."
Athugasemdir