Danski framherjinn Anton Söjberg verður ekki áfram hjá HK eftir að hann rifti samningi sínum við félagið á dögunum.
Ómar Ingi Guðmundsson, þjálfari HK, var hissa á því og var ekki sáttur með hvernig Söjbjerg stóð að þessu.
„Hann veit alveg að við erum ekki sáttir við þetta. Okkur fannst við standa allt sem við sögðum þegar hann samdi við okkur; að hann fengi að spila og hvernig við spiluðum. Okkur fannst hann vera gott 'fit' og honum leið vel. Klásúlan var sett fyrir ákveðin atvik, en að nota hana til þess svo að biðja okkur um að hækka launin sinn og breyta klásúlunni í að hann gæti labbað út aftur seinna; á miðju tímabili. Það er ekki heiðarlegt miðað við öll þau samtöl sem við áttum," sagði Ómar við Fótbolta.net.
Söjbjerg hefur nú svarað Ómari en hann var í viðtali hjá danska miðlinum Tipsbladet.
„Ég var með ákvæði sem ég valdi að nýta mér til að tryggja að ég væri á góðum stað. Þá gæti ég bæði endursamið við HK, sem mig langaði svo sannarlega til, en ég vildi líka tryggja það að þeir myndu byggja upp topp 6 lið, svo þeir myndu standa við sinn hluta samningsins," sagði Söjbjerg.
„Ég tilkynnti félaginu skriflega í nóvember mánuði að ég væri 100% tilbúinn að spila áfram fyrir sömu laun og við sömdum um í sumar þegar ég skrifaði undir. Ef ég hefði ekki nýtt mér ákvæðið, þá væri ég fastur þarna í heilt ár til viðbótar. Þeir lofuðu einhverjum metnaði sem ég sá ekki fara gerast."
