Arjen Robben, leikmaður hollenska landsliðsins, var auðvitað svekktur eftir 2-0 tap liðsins gegn Íslandi í undankeppni EM í kvöld.
Gylfi Þór Sigurðsson kom Íslandi yfir með marki úr vítaspyrnu og bætti svo öðru marki við eftir hornspyrnu. Robben var ekki ánægður með hollenska liðið í dag.
,,Það verður að hrósa Íslandi. Við hjálpuðum þeim með mörkin og gáfu þeim þessi mörk og gerðum okkur erfitt fyrir."
,,Þeir komu ekki á óvart, við vissum að þetta væri gott lið. Þetta snýst ekki bara um Ísland heldur hvernig við spiluðum. Við fundum ekki pláss og ekki menn frammi í góðum stöðum og þetta verður erfitt ef við gefum þeim tvö mörk."
,,Þeir gerðu þetta vel og vörðust vel. Við vissum að við yrðum að fá ekki á okkur mark og gefa ekki mörk frá okkur. Við vinnum saman og töpum saman og ég vil ekki benda á einn né neinn, við fengum góð tækifæri en við töpuðum saman í dag."
,,Þetta lítur ekkert sérstaklega vel út en það eru margir leikir eftir. Ísland er komið með gott forskot og Tékkland líka og við verðum að koma sterkir til baka. Við megum ekki gera fleiri mistök," sagði hann að lokum.
Athugasemdir