Lestu um leikinn: Valur 6 -  7 Víkingur R.

„Þetta var gott, við ferðuðumst í 20 tíma frá Tyrklandi í gær. Við vissum að þetta yrði erfitt. Valur ætti að vera að berjast um titilinn með liðið sem þeir hafa."

„Við gerðum það sem við gerum best og unnum að í Tyrklandi, ég er ánægður með að skora og ánægður með að komast áfram. Það var lélegt að fá á okkur mark í lokin og við hefðum átt að vinna án vítaspyrnukeppninnar."

Valsmenn fengu töluvert fleiri færi og voru betri aðilinn, Gary var sammála því.

„Þeir spiluðu betri fótbolta, við vorum þreyttir en við héldum okkur við okkar taktík og það sem við höfum verið að vinna í."

Gary hefði getað fullkomnað þrennuna er hann var að sleppa í gegn undir lokin en Andri Fannar Stefánsson braut þá á honum og fékk rautt spjald að launum.

„Ég hefði átt að skora þrennu ef Andri Fannar hefði ekki brotið af mér og fengið rautt spjald, þá hefði leikurinn verið búinn en það var góð ákvörðun hjá honum þar sem þeir voru ennþá inn í leiknum. Ég er ánægður með að við getum unnið lið eins og Val, þó það var í vítaspyrnukeppni."

Gary hefði viljað fá vítaspyrnu er hann var kominn einn gegn Ingvar Kale og Ingvar virtist augljóslega taka hann niður.

„Þetta var fáranleg ákvörðun, þetta er víti í tíu af tíu skiptum. Þetta var fáranlegt og ég sagði línuverðinum að þetta hafi verið skandall. Þetta var versta ákvörðun sem ég hef séð síðan ég byrjaði að spila fótbolta. Þetta skiptir ekki máli í þessum leik en ef þetta gerist í sumar verð ég ekki ánægður."

Hann segist sjaldan hafa verið jafn ánægður og eftir að hann gékk til liðs við Víkings.

„Ég hef ekki verið svona ánægður í langan tíma, ég fór til Víkings til að verða ánægður aftur og þegar ég er ánægður get ég spilað svona. Eina sem skiptir máli er að ég nýt þess að spila aftur. Ég var ekki Gary Martin á síðasta ári ég var mjög sorgmæddur utan vallar."

Gary spilaði á vinstri vængnum í dag en honum er sama svo lengi sem hann fái að spila.

„Víkingur á mig, ég verð að gera það sem mér er sagt og á meðan ég er að spila þá er ég ángæður, ég spilaði ekki í fyrra og það var fáranlegt. Ég er eins ánægður og ég verð á meðan ég er á fótboltavelli."

Víkingur fær hans gömlu félaga í úrslitaleiknum og hlakkar Gary til að glíma við fyrrum liðsfélagana.

„Það verður erfitt, við vorum að koma frá tíu daga ferð í Tyrklandi. Við spiluðum gegn Val í dag og áttum leik í Tyrklandi á föstudaginn. KR fékk hvíld og þeir eru með flott lið. Það verður erfitt en þessi keppni skiptir ekki miklu máli en mig hlakkar til."

Viðtalið má sjá í heild sinni hér að ofan.