Spá Fótbolta.net - 12. sæti: Fram

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. Fram 17 stig

Um liðið: Fram er mætt aftur á meðal þeirra Bestu eftir að hafa fallið árið 2014. Fram var langbesta liðið í Lengjudeildinni í fyrra, fór taplaust í gegnum deildina, setti stigamet og var ljóst mjög snemma að liðið væri á leið upp. Síðast þegar Fram var uppi var liðið tveimur stigum frá því að halda sér uppi.



Þjálfari - Jón Sveinsson: Undir stjórn Nonna, sem tók við Fram fyrir tímabilið 2019, hefur gengi Fram verið upp á við á hverju ári. Tímabilið 2019 var liðið 7. sæti, 2020 var liðið markatölunni frá því að fara upp og í fyrra missti liðið einungis af átta stigum. Jón er einn leikjahæsti leikmaður í sögu Fram með 312 leiki fyrir meistaraflokk félagsins. Hann varð þrisvar sinnum Íslandsmeistari og þrisvar sinnum bikarmeistari með félaginu á 9. áratugnum. Hann er dáður og dýrkaður innan félagsins, og hefur komið inn með jákvæða strauma sem þjálfari meistaraflokks karla. Aðalsteinn Aðalsteinsson og Þórhallur Víkingsson eru Nonna til aðstoðar.

Styrkleikar: Nýr heimavöllur þegar hann kemst í gagnið, það ætti að vera styrkleiki. Liðið hefur ekki náð að stilla upp sínu sterkasta liði í vetur og menn gætu haldið fast í þá trú að liðið geti ekki tapað þegar besta liðið kemur saman. Þjálfarinn og yfirvegun hans er styrkleiki og þá er hópurinn tiltölulega leikreyndur, leikmenn sem eiga marga leiki undir beltinu þó að þeir séu kannski fæstir í efstu deild. Breytingarnar á hópnum eru fáar og menn þekkja vel til liðsfélaganna.

Veikleikar: Missirinn í Kyle McLagan er svakalegur á pappírunum. Hann gerði alla í kringum sig betri, sem dæmi leit Gunnar Gunnarsson við hlið hans mjög vel út og átti sitt besta tímabil á ferlinum. Miðvarðaparið er augljós veikleiki á þessum tímapunkti. Framherjinn Þórir Guðjónsson hefur leyst stöðu miðvarðar í vetur en það eru kannski svona tíu á landinu sem hafa trú á því að það geti gengið í sumar.

Lykilmenn: Fred og Albert Hafsteinsson. Fred hefur undanfarin ár verið algjör lykilleikmaður í sóknarleik Fram. Hann vakti ekki jafnmikla athygli í fyrra þar sem liðið var í heild sinni frábært og frekar jafnt. Fred hefur skorað 26 mörk í 79 deildarleikjum frá komu sinni í Fram árið 2018. Albert átti frábært tímabil í fyrra, skoraði níu mörk í nítján leikjum og var að mörgum talinn besti leikmaður Lengjudeildarinnar.

Hlaðvarpsþátturinn Ungstirnin mælir með:
Tryggvi Snær Geirsson spilaði 16 leiki í fyrra í deild, þá alla sem hægri kantmaður í kerfinu 4-2-3-1. Hann er að mörgu leyti svipaður leikmaður og bróðir sinn Stefán Árni. Hann er með góða tækni á boltanum og getur farið framhjá mönnum þrátt fyrir að vera ekki með neinn gífurlegan hraða. Hann hefur ekki verið mikill markaskorari, á mikið inni í þeim málum en hann lagði upp slatta af mörkum í öflugu sóknarliði Fram þar sem mörk og stoðsendingar dreifðust á marga leikmenn.

Spurningarnar: Hver á að skora öll mörkin? Mun nýi framherjinn haldast heill? Kemur inn miðvörður fyrir mót? Eru bestu leikmennirnir nægilega góðir eða er gæðaskiptingin í hópnum of jöfn?

Völlurinn: Fram mun spila á nýjum velli, Framvellinum í Úlfarsárdal, þegar búið verður að leggja gervigrasið. Það er ekki ljóst hvenær það verður og líkur á því að fyrsti heimaleikur liðsins verði spilaður annars staðar. Aðstaðan við völlin er hin glæsilegasta en stærsta spurningamerkið er kannski hvar þeir sem heimsækja svæðið eiga að leggja ökutækjum sínum.

Fyrirliðinn segir - Hlynur Atli Magnússon
„Miðað við það sem hefur verið spáð í vetur, talað um að við höfum ekki fengið einhverja leikmenn og þar fram eftir götunum þá kemur þetta mér ekki á óvart - ég var ekki með hökuna í gólfið. Svo er það annað, ég tel að vð séum með nægilega góðan hóp til að halda okkur uppi. Við förum upp með glæsibrag í fyrra, höldum í flesta en það er svolítið imprað á því að við höfum misst einhverja leikmenn. Við höfum fengið einhverja leikmenn inn og ég held að stefnan sé að fá fleiri inn. Ég tel að við getum afsannað þessa spá og það er markmiðið okkar."

Komnir
Jannik Pohl frá Danmörku
Jesús Yendis frá Venesúela
Tiago Fernandes frá Grindavík

Farnir
Danny Guthrie
Kyle McLagan til Víkings R.
Haraldur Einar Ásgrímsson í FH

Fyrstu fimm leikir Fram:
20. apríl Fram - KR
25. apríl FH - Fram
2. maí Fram - ÍA
7. maí Stjarnan - Fram
12. maí Fram - Víkingur R.

Hin hliðin:
Gunnar Gunnarsson

Sterkasta byrjunarliðið að mati Fótbolta.net:


Aðrir leikmenn:
Þórir Guðjónsson - 7
Orri Gunnarsson - 10
Jökull Steinn Ólafsson - 11
Stefán Þór Hannesson - 12
Arnór Daði Aðalsteinsson - 16
Matthías Kroknes Jóhannsson - 18
Tryggvi Snær Geirsson - 20
Óskar Jónsson - 22
Már Ægisson - 23
Magnús Ingi Þórðarson - 24
Aron Kári Aðalsteinsson - 26
Sigfús Árni Guðmundsson - 27
Aron Snær Ingason - 32
Alexander Már Þorláksson - 33
Benjamín Jónsson - 34
Breki Baldursson - 37
Dagur Margeirsson - 38
Mikael Trausti Viðarsson - 40
Róbert Daði Sigurþórsson - 41
Stefán Orri Hákonarson - 42
Þengill Orrason - 43
Guðmundur Magnússon - 77

Spámennirnir: Aksentije Milisic, Brynjar Ingi Erluson, Egill Sigfússon, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Sverrir Örn Einarsson, Sæbjörn Þór Þórbergsson Steinke, Tómas Þór Þórðarson og Úlfur Blandon