Spáin:
1. ?
2. ?
3. Stjarnan, 120 stig
4. ÍA, 102 stig
5. KR, 90 stig
6. Valur, 88 stig
7. KA, 74 stig
8. Fram, 67 stig
9. FH, 46 stig
10. Þór, 36 stig
11. ÍBV, 22 stig
12. Keflavík, 17 stig

Um liðið: Stjarnan endaði í 3. sæti deildarinnar á síðustu leiktíð eftir að hafa hótað smá titilbaráttu þegar deildin skiptist seint um sumarið. Um leið og þeir voru farnir að hóta titilbaráttu, þá gáfu Garðbæingar hins vegar eftir og enduðu langt á eftir Víkingum sem urðu Íslandsmeistarar. Stjarnan vann ekki leik eftir að deildin skiptist. „Stjarnan verður að fara gera eitthvað, í guðanna bænum. Þetta er búið að vera það sama í þrjú ár. Ég held að Jökull þurfi að skila einhverju í sumar. Mér finnst þetta búið að einkennast af óstöðugleika. Þegar hann vinnur leiki spilar hann á sama liðinu, þá gerir hann það vel. Miðað við mannskapinn neita ég að trúa öðru en að Stjarnan geti veitt Víkingum einhverja keppni," sagði Heimir Guðjónsson, þjálfari Fylkis, í útvarpsþættinum Fótbolti.net, fyrir nokkrum vikum síðan og það hlýtur að vera markmiðið í Garðabænum; að veita Víkingum samkeppni um þann stóra.

Þjálfarinn: Jökull Elísabetarson er að fara inn í sitt þriðja heila tímabil sem þjálfari Stjörnunnar eftir að hafa verið aðstoðarþjálfari Ágústar Gylfasonar þar áður. Á ferli sínum sem leikmaður spilaði Jökull með KR, Víkingi, Breiðabliki, ÍBV, KV, HK og Augnabliki. Jökull er af nýja skólanum en hann þjálfaði áður Augnablik, venslafélag Breiðabliks, við góðan orðstír. Hann þykir mjög svo spennandi þjálfari sem verður áhugavert að fylgjast með í framtíðinni, en hann er svolítið óútreiknanlegur og hefur verið með áhugaverðar hugmyndir um fótbolta. Jökull á enn eftir að sýna að hann geti unnið eitthvað með Stjörnunni og það er pressa á honum komandi inn í þetta sumar. Mögulega er hann sá þjálfari sem er í heitasta sætinu komandi inn í tímabilið.

Styrkleikar: Stjarnan er með einn af bestu leikmannahópunum í deildinni og breiddin er gríðarlega góð. Það á eftir að vera hausverkur fyrir Jökul og hans teymi að velja liðið í sumar. Þeir hafa styrkt sig vel í vetur og fengu einn besta leikmann deildarinnar, Birni Snæ Ingason, í sínar raðir. Birnir kemur til með að krydda vel upp á sóknarleikinn. Stjarnan er með sterka leikmenn í hverri einustu stöðu og samkeppnin í hópnum er góð. Í fyrra sýndu þeir á sér nýjar hliðar þegar þeir fóru mikið að harka sigra en það er jákvætt að þeir geti gert það líka í bland við það að spila góðan og aðlaðandi fótbolta. Þeir eru óútreiknanlegir og það getur verið styrkleiki. Í hópnum er góð blanda af yngri og reynslumeiri leikmönnum og það er kraftur á pöllunum líka þar sem Silfurskeiðin lætur vel í sér heyra.

Veikleikar: Það var svolítill óstöðugleiki í Stjörnunni síðasta sumar, þeir voru mikið upp og niður. Það er erfitt að ráða í Stjörnuna og of mikill hræringur gæti farið illa í hausinn á ungum mönnum. Þú þarft stöðugleika til að vinna titla og það er spurning hvort Stjörnumenn séu með það. Þeir eiga allavega eftir að sýna það og sanna. Það er mikil pressa á Stjörnunni komandi inn í tímabilið að fara að skila einhverju og það gæti verið erfitt að ráða við þá pressu. Í Garðabænum virðast menn skiptast í ákveðnar fylkingar um það hvort liðið sé á réttri leið og ekki allir sannfærðir. Varnarleikurinn var ekki nægilega góður á síðustu leiktíð og vantaði að menn myndu stíga upp á þeim enda vallarins. Menn í liðinu eiga eftir að sýna það og sanna að þeir séu sigurvegarar, að þeir geti skilað titlum í hús fyrir félagið í meistaraflokki.

Lykilmenn: Birnir Snær Ingason og Emil Atlason
Stjörnumenn lönduðu einum stærsta bitanum á markaðnum í vetur þegar Birnir Snær Ingason gekk í raðir félagsins. Birnir er 28 ára kantmaður sem kom öflugur inn í lið KA og hjálpaði liðinu úr erfiðri stöðu á síðasta tímabili. Tímabilið 2023 var Birnir besti leikmaður Íslandsmótsins og hann er einn af þeim sem er líklegastur í þá nafnbót í sumar. Emil er þá sóknarmaðurinn sem Birnir á að finna í teignum. Það er vonandi fyrir Stjörnuna að Emil haldist heill því ef það gerist þá aukast líkurnar á því að eitthvað gott gerist í Garðabænum í sumar.

Gaman að fylgjast með: Ibrahim Turay
Það er alltaf mikið um efnilega leikmenn í Garðabænum og einn þeirra er til dæmis Haukur Örn Brink sem hefur leikið fantavel á undirbúningstímabilinu. En við nefnum Ibrahim Turay hér sem leikmann til að fylgjast með en hann hefur einnig verið sterkur í vetur. Turay var kynntur sem nýr leikmaður Stjörnunnar undir lok félagaskiptagluggans síðasta sumar en spilaði ekki eftir það þar sem hann fékk ekki vegabréfsáritun. Turay á að baki landsleiki fyrir Síerra Leóne og er skemmtilegur leikmaður.

Spurningarnar: Getur Stjarnan tekið skrefið og orðið meistari? Verður Birnir Snær besti leikmaður deildarinnar? Finna þeir liðið sitt?

Völlurinn: Samsungvöllurinn er svo sannarlega ekki flottasti völlur deildarinnar þegar horft er á leiki í sjónvarpinu og það er yfirleitt frekar kalt þegar maður skellir sér á völlinn. En stemningin er góð og Silfurskeiðin lætur ávallt í sér heyra. Þá stendur Dúllubarinn alltaf fyrir sínu.

Komnir:
Birnir Snær Ingason frá KA
Darri Bergmann Gylfason frá Augnabliki
Gustav Kjeldsen frá Vestra
Sveinn Sigurður Jóhannesson frá Val

Farnir:
Adolf Daði Birgisson í FH
Steven Caulker hættur og farinn til Tyrklands
Þorlákur Breki Baxter til Keflavíkur (var á láni hjá ÍBV)
Baldur Logi Guðlaugsson til Keflavíkur
Sigurður Gunnar Jónsson í HK (lán)
Andri Adolphsson hættur
Aron Dagur Birnuson í Þrótt R. (á láni)
Tristan Freyr Ingólfsson í Gróttu

Leikmannalisti:
1. Darri Bergmann Gylfason (m)
12. Árni Snær Ólafsson (m)
Sveinn Sigurður Jóhannesson (m)
2. Heiðar Ægisson
3. Gustav Kjeldsen
4. Þorri Mar Þórisson
5. Guðmundur Kristjánsson
6. Sindri Þór Ingimarsson
7. Örvar Eggertsson
8. Jóhann Árni Gunnarsson
10. Samúel Kári Friðjónsson
14. Birnir Snær Ingason
18. Guðmundur Baldvin Nökkvason
19. Daníel Finns Matthíasson
20. Alpha Conteh
21. Ibrahim Turay
22. Emil Atlason
23. Benedikt Warén
29. Alex Þór Hauksson
31. Damil Dankerlui
32. Örvar Logi Örvarsson
37. Haukur Örn Brink
39. Elvar Máni Guðmundsson
49. Aron Freyr Heimisson
78. Bjarki Hauksson
99. Andri Rúnar Bjarnason

Fyrstu fimm leikir Stjörnunnar:
12. apríl, KA - Stjarnan (Greifavöllurinn)
17. apríl, Stjarnan - FH (Samsungvöllurinn)
23. apríl, Víkingur R. - Stjarnan (Víkingsvöllur)
27. apríl, Stjarnan - Valur (Samsungvöllurinn)
3. maí, ÍA - Stjarnan (ELKEM völlurinn)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.