Pierre-Emerick Aubameyang hefur reynst algjör lykilmaður fyrir Arsenal en hann á aðeins eitt ár eftir af samningi sínum við félagið.
Aubameyang er 31 árs gamall og hefur gert 70 mörk í 109 leikjum á tveimur og hálfu ári. Arsenal hefur verið að spila langt undir væntingum síðustu ár og vill félagið gera allt í sínu valdi til að halda framherjanum öskufljóta.
Samkvæmt Mirror myndi Auba fá 250 þúsund pund á viku með nýja samningnum og yrði þannig næstlaunahæsti leikmaður félagsins eftir Mesut Özil, sem á einnig ár eftir af sínum samningi.
Arsenal getur leyft sér að bjóða honum svo góðan samning eftir að Auba tryggði þátttöku í Evrópudeildinni á næsta ári með því að skora tvennu í 2-1 sigri gegn Chelsea í úrslitaleik FA bikarsins um helgina.
Mikel Arteta, stjóri Arsenal, hefur miklar mætur á Aubameyang og segir hann vera á góðri leið með að verða að goðsögn hjá félaginu.
„Við höfum alltaf haft ótrúlega sóknarmenn hjá þessu félagi og Auba á skilið samanburð við þá allra bestu sem hafa spilað hér."
Thierry Henry, Dennis Bergkamp, Ian Wright og Robin van Persie eru meðal frægustu sóknarmanna Arsenal frá aldamótum.
Athugasemdir
