Þessir þurfa að stíga upp eftir landsleikjahlé

Danijel Dejan Djuric (KA) - Hann var keyptur dýrum dómi til KA frá Króatíu en hefur ekki staðið undir væntingum til þessa. Hann á enn eftir að koma að marki í deildinni og KA þarf að ná að koma honum í gang.

Höskuldur Gunnlaugsson (Breiðablik) - Þrátt fyrir að hafa ekki verið slakur á tímabilinu hefur Höskuldur ekki náð þeim hæðum sem áhorfendur hafa vanist frá honum. Hann hefur verið að glíma við meiðsli sem gætu spilað þar inn í.

Sigfús Fannar Gunnarsson (Þór) - Markahæsti og besti leikmaður Lengjudeildarinnar í fyrra en hefur ekki komið að marki í ár. Þórsarar hafa aðeins skorað sjö mörk og er lykilatriði fyrir þá að ná Sigfúsi á skrið. Hann hefur verið að glíma við meiðsli og hefur því komið minna við sögu en skyldi.

Árni Snær Ólafsson (Stjarnan) - Eftir gott síðasta tímabil hefur Árni verið langt frá sínu besta í ár. Hefur stundum tekið upp á því að skutla sér ekki sem margir hafa furðað sig á. Fær að meðaltali á sig 2.2 mörk í leik.

Birnir Snær Ingason (Stjarnan) - Eftir að hafa byrjað tímabilið frábærlega þá hefur fjarað hratt undan þessu hjá Birni. Hefur ekki komið að marki síðan í þriðju umferð.

Kjartan Kári Halldórsson (FH) - Sem lykilmaður FH verður hann að taka meira til sín. Hann hefur ekki fengið mikla hjálp frá liðsfélögum sínum og biðja FH-ingar eflaust til guðs um að hann stígi upp og komi liðinu úr þeim vandræðum sem það er í.

Vicente Valor (ÍBV) - Einn af lykilmönnum ÍBV sem hefur ekki náð sér á strik. Útlitið er þó bjartara fyrir Eyjamenn eftir síðustu tvo leiki og ef ÍBV ætlar að halda sér í deildinni verður Valor að stíga upp.

Oliver Heiðarsson (KA) - Eins og með Danijel þá virðist hann vera með sjálfstraustið í lágmarki eftir dvöl í Króatíu. Hefur sýnt að það búi meira í honum.