Álfhildur Rósa Kjartansdóttir, fyrirliði Þróttar var að vonum sátt eftir 2-0 útisigur á Aftureldingu í Bestu deild kvenna í kvöld.
„Bara ótrúlega gott að ná þessum þremur stigum. Sérstaklega þegar við erum að koma aftur til baka, það er stundum smá erfitt en mér fannst við mjög solid í dag," sagði Álfhildur í viðtali beint eftir leik.
„Í fyrri hálfleik fannst mér við vera með yfirhöndina, vorum eiginlega allan tímann með boltann. Það kom kafli í seinni hálfleik þar sem var smá ströggl á okkur, ég held að það hafi verið eftir fyrsta markið okkar. En svo um leið og við náðum öðru markinu inn þá fannst mér þetta vera komið."
Lestu um leikinn: Afturelding 0 - 2 Þróttur R.
Það var lengi vel markalaust í leiknum en Þróttur náði forystunni á 74. mínútu leiksins.
„Það var smá bras að reyna að koma boltanum inn en við vorum að skapa góð færi en það vantaði að koma honum inn."
Þróttur er sem stendur í 4. sæti deildarinnar og segist Álfhildur vera sátt við þá stöðu.
„Já auðvitað, nú er þetta bara byrjað aftur og maður verður að koma sér í gírinn. Það er mjög gott að vera á þessum stað í deildinni, þannig bara halda áfram svona," sagði Álfhildur Rósa.
Viðtalið má sjá í heild sinni í spilaranum hér fyrir ofan.
