23 leikir fara fram í riðlakeppni Evrópudeildarinnar í kvöld. Tvö ensk félög eru þar á meðal, Manchester United fær Partizan í heimsókn og Slovan kemur frá Bratislava og heimsækir Úlfana.

Þrír leikir eru á sportrásum Stöð 2. Í fyrsta sjónvarpsleik dagsins heimsækir AZ lið Astana í Kasakstan. Albert Guðmundsson er fjarri góðu gamni hjá AZ og þá er Rúnar Már Sigurjónsson tæpur hjá Astana.

Lokasjónvarpsleikur dagsins fer fram í sama riðli, L-riðli, þegar United tekur á móti Partizan frá Belgrad. United er á toppi riðilsins en liðið hefur unnið tvo leiki og gert eitt jafntefli til þessa.

Annar sjónvarpsleikurinn er viðureign Lazio og Celtic í E-riðli. Fyrri viðureign liðanna var mjög spennandi og bjargaði Fraser Forster Skotunum með frábærri vörslu undir lok leiks eftir að Celtic hafði komið til baka úr stöðunni 0-1.

Krasnodar, þar sem Jón Guðni Fjóluson spilar, á leik á móti Trabzonspor og Arnór Ingvi Traustason og hans samherjar í Malmö heimsækja Lugano. Þá á CSKA, þar sem Hörður Björgvin Magnússon og Arnór Sigurðsson leika, útileik. Alla leiki dagsins má sjá hér að neðan.