Ísland fer upp um flokk í Evrópu eins og staðan er núna

Íslensk félagslið halda áfram að hækka á styrkleikalista UEFA með góðum árangri Víkings í Sambandsdeildinni. Víkingur vann FK Borac 2-0 í dag.

Eins og staðan er núna er Ísland komið upp í 33. sæti og er á leið upp um flokk. Ísland er komið uppfyrir þjóðir eins og Kosóvó og Armeníu á listanum.

Ef Ísland endar á því að fara upp um flokk þá munu bikarmeistararnir á næsta ári fara í forkeppni Evrópudeildarinnar. Eitt af Sambandsdeildarsætunum þremur breytist semsagt í Evrópudeildarsæti. Það gefur aukið færi á því að komast lengra í Evrópu.

Víkingur á mikilvæga leiki framundan, meðal annars gegn Noah frá Armeníu en eins og áður segir þá er Ísland í baráttu við Armeníu um að komast upp um flokk.

Víkingur fékk rúmlega 60 milljónir íslenskra króna í kassann fyrir sigurinn gegn Cercle Brugge og fær aðrar 60 milljónir fyrir sigurinn gegn Borac. Vísir greinir frá því að samtals hafi Víkingur tryggt sér 750 milljónir.