Emery staðfesti samningsviðræður

Emery hefur gert frábæra hluti á fjórum árum við stjórnvölinn. Núverandi samningur hans við félagið rennur út sumarið 2029 en þjálfarinn fær endurbættan samning í ljósi áhuga ýmissa stórvelda á þjónustu hans.

Í nýjum samningi felast aukin völd fyrir Emery og svaraði þjálfarinn spurningum á fréttamannafundi í gær, fyrir leik Aston Villa gegn Manchester United sem hefst á morgun klukkan 16:30.

„Ég átti mjög góðan fund með Nassef Sawiris (eiganda og forseta félagsins) og við höldum viðræðum áfram í næstu viku. Mitt markmið er að halda áfram að styrkja Aston Villa sem fótboltalið og fótboltafélag og stjórnin er með mér í því," sagði Emery.

„Þetta er risastór áskorun og við erum á réttri leið. Stjórnin stækkaði leikvanginn og við erum með sífellt meiri pening bæði til að kaupa leikmenn og bjóða þeim samkeppnishæf laun. Við erum að stækka ímynd félagsins á heimsvísu með góðum frammistöðum á Englandi og í Evrópu.

„Markmiðið er að halda áfram að kaupa unga og efnilega leikmenn, hjálpa þeim að þróa sinn leik og selja þá ef þeir vilja fara þegar nægilega hátt tilboð berst. Þetta er ferlið sem við þurfum að ganga í gegnum til að stækka sem félag."