Skrítnasta regla fótboltans var afnumin og félögin eru að venjast því

Í áratugi hefur fótboltaáhugafólk velt því fyrir sér afhverju leikklukkan stoppar alltaf í 45 eftir fyrri hálfleik og 90 í lok leiktíma þegar uppbótartími er enn eftir.

KSÍ breytti þessari reglu hjá sér fyrir þetta tímabil, nú ráða félögin því sjálf hvort klukkan gangi áfram eða ekki. Allur gangur var á þessu í fyrstu fimm leikjum 1. umferðar Bestu-deildar karla um helgina.

Víkingur lét klukkuna sína í Víkinni ganga áfram í fyrsta leik mótsins á móti Stjörnunni á laugardagskvöldið.

Framarar létu hana bara ganga upp í 45 í fyrri hálfleik gegn Vestra í gær en höfðu kippt því í lag í lok leiksins. KA lét klukkuna ganga áfram þegar HK kom í heimsókn.

Tíminn stóð í stað hvað þetta varðar hjá Val því þar stoppaði klukkan í 45 þegar flautað var til hálfleiks en eins og hjá Fram var því kippt í lag fyrir uppbótartímann í lok leiksins.

Í Árbænum gekk klukkan svo áfram allan uppbótartímann þegar Fylkir og KR mættust. Mikil dramatík var í lokin þar og því gaman fyrir áhorfendur að átta sig á hvað tímanum leið.