Maresca: Við treystum félaginu en skiljum hávaðann

Man City var fundið sekt í málinu í byrjun landsleikjagluggans eftir afar langt ferli. Félagið hefur áfrýjað niðurstöðunni og heldur fram sakleysi sínu, en það var meðal annars fundið sekt um að gera sýndarsamninga við styrktaraðila.

Enn gætu liðið mörg ár áður en endanleg niðurstaða fæst. Keppinautar City í úrvalsdeildinni eru ósáttir og vilja að félaginu verði refsað harðlega.

Maresca ræddi málið á heimasíðu Man City í dag og sagðist bera fullt traust til félagsins.

„Persónulega er ég rólegur. Félagið hefur talað skýrt og við treystum því fullkomlega, en við skiljum hávaðann. Við einbeitum okkur að því sem við getum stjórnað og það er fótboltinn,“ sagði Maresca.

Hann segir andann í klefanum góðan og leikmenn einbeita sér að því sem gerist á vellinum.

„Andrúmsloftið er frábært. Þeir eru spenntir fyrir næstu tveimur leikjum enda erum við á toppi deildarinnar. Þeir vita að þeir geta aðeins stjórnað því sem gerist á vellinum og hafa ekki áhyggjur af öðru. Þeir eru atvinnumenn og hugsa um hvernig við getum unnið Liverpool. Með stuðning áhorfenda getum við reynt að sækja sigur á Anfield.“

Maresca var einnig beðinn um að senda stuðningsmönnum skilaboð fyrir heimsóknina á Anfield á sunnudag og hvatti þá til að láta vel í sér heyra.

„Við mætum með ástríðu og leikáætlun, en við þurfum að heyra í þeim og finna fyrir ástríðu þeirra. Ég horfði á útileikinn í fyrra og fögnuðurinn í lokin var frábær. Við þurfum öll að standa saman.“

„Ég hef oft sagt að ástæðan fyrir því að félagið hefur verið í fremstu röð síðustu fimmtán ár sé sú að allir stefna í sömu átt, eigandinn, stjórnarformaðurinn, yfirmaður íþróttamála, framkvæmdastjórinn, stjórinn, leikmennirnir og stuðningsmennirnir. Það er frábært,“ sagði Maresca.