„Sakna hennar gríðarlega mikið"

Hún spilar vanalega við hlið Glódísar Perlu Viggósdóttur, landsliðsfyrirliða, í hjarta varnarinnar en Glódís var spurð út í Ingibjörgu í viðtali í dag.

„Já, ég sakna hennar gríðarlega mikið," sagði Glódís.

„Hún er ekki bara frábær inn á vellinum. Hún er líka frábær vinkona og mikill leiðtogi. Það er skarð eftir hana en ég er viss um að næsti leikmaður er klár að stíga upp og taka við þessu kefli."

„Það er staðan á þessum hóp. Þegar einhver hefur dottið út, þá hefur næsta manneskja verið klár að taka við."

Ísland spilar á morgun við Króatíu í fyrri leik liðanna í umspili um að komast á HM.