Lazio tók á móti Ítalíumeisturum Juventus í fyrsta leik dagsins í ítalska boltanum og gerði Cristiano Ronaldo fyrsta mark leiksins eftir stundarfjórðung.

Juan Cuadrado gaf fasta fyrirgjöf fyrir markið og náði Ronaldo að koma líkamanum í boltann og þaðan hrökk hann í netið.

Juve var með yfirhöndina en heimamenn voru hættulegir. Ronaldo komst nálægt því að tvöfalda forystuna en skalli hans fór í samskeytin.

Þegar Juve virtist vera með sigurinn í höndunum tók Lazio að sækja án þess þó að skapa mikla hættu fyrr en á lokasekúndunum. Joaquin Correa gerði þá frábærlega, hann tætti vörn Juve í sundur og gaf á varamanninn Felipe Caicedo sem skoraði með síðasta sparki leiksins.

Juve er í þriðja sæti eftir jafnteflið, með 13 stig eftir 7 umferðir. Lazio er með 11 stig.