Bryndís Lára glímdi við meiðsli á síðustu leiktíð sem hélt henni frá vellinum í leikjum í fyrra. Fótbolti.net hafði samband við Bryndísi og spurði hana út í stöðu mála.

„Þegar stórt er spurt. Staðan er ekki góð þar sem ég er enn að glíma við meiðsli í baki sem voru að hrjá mig síðasta sumar," sagði Bryndís við Fótbolta.net aðspurð hvort hún stefndi á að taka þátt á komandi keppnistímabili.

„Þetta eru búin að vera frekar erfið og leiðinleg meiðsli þar sem bakið gefur sig við ótrúlegustu hreyfingar. Maður slysast til að hnerra og næsta hálftímann labbar maður um í 90 gráðu horni."

„Ég var í æfingabúðum í Tælandi í mánuð í desember og reyndi þar ótrúlegustu hluti til að koma bakinu í gang en það gaf sig um leið og ég kom heim. Satt best að segja veit ég ekki hvað tekur við hjá mér og ég held að læknarnir viti það ekki heldur."

„Eins og staðan er í dag þá snýst þetta númer eitt, tvö og þrjú að ná heilsunni og vera verkjalaus. Ég sé mig ekki í fótbolta næstu vikur eða mánuði. Það gerist fyrst þegar ég er orðin verkjalaus," sagði Bryndís við Fótbolta.net