Spá þjálfara og fyrirliða fyrir Lengjudeildina: 12. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. Völsungur, 15 stig

12. Völsungur
Annað sumarið í röð er Völsungi spáð neðsta sæti Lengjudeildarinnar, en fyrir þetta sumar er þeim spáð botninum með enn meiri yfirburðum. Nánast allir þeir sem sendu inn sína spá eru með Völsung í neðsta sæti og það er erfitt að segja annað en að það sé skiljanlegt. Þeir stóðu sig frábærlega á síðasta tímabili og voru í engri fallhættu allt sumarið, komu öllum á óvart og enduðu að lokum í 7. sæti. En núna er staðan önnur. Aðalsteinn Jóhann Friðriksson, Alli Jói, hætti sem þjálfari liðsins en hann var ein stærsta ástæðan fyrir þessum magnaða árangri og festan í liðinu. Húsvíkingar hugsuðu út fyrir boxið í þjálfararáðningu en það gekk engan veginn upp og eru þeir í leit að nýjum þjálfara þegar stutt er í mót. Þetta er alls ekki ákjósanleg staða og Völsungur er í slæmri stöðu á leiðinni inn í sumarið. Það hefur líka gengið illa á undirbúningstímabilinu og þurftu þeir að hætta í Lengjubikarnum þar sem þeir náðu ekki í lið. Geta þeir komið öllum aftur á óvart?

Þjálfarinn: Ævintýramanninum Patrick De Wilde var sagt upp störfum hjá Völsungi fyrr í þessari viku eftir að hafa verið ráðinn til að taka við af Alla Jóa í vetur. De Wilde stýrði kvennalandsliði Nepal áður en hann tók við Húsvíkingum, en þar áður var hann við stjórnvölinn hjá karlalandsliðum Sómalíu og Rúanda í Afríku. Hann ætlaði sér stóra hluti á Húsavík en þetta var blanda sem virkaði ekki saman og er Völsungur núna í leit að þjálfara. Þeir Elfar Árni Aðalsteinsson og Bjarki Baldvinsson munu stýra liðinu til bráðabirgða og spurning hversu lengi þeir stýra liðinu.

Álit Badda
Baldvin Már Borgarsson, þjálfari Árbæjar, er sérfræðingur Fótbolta.net fyrir Lengjudeildina. Hann rýnir í öll liðin fyrir tímabilið sem er framundan.
Á mjög erfiðum og sérstökum stað
„Húsvíkingar koma á mjög erfiðum og sérstökum stað inn í mótið eftir rússíbanareið með Belganum geðuga Patrick De Wilde, sem var bæði ráðinn og svo rekinn á milli tímabilanna, eftir virkilega gott tímabil Völlara í fyrra sem því miður virðast alls ekki hafa náð að nota þann meðbyr til frekari uppbyggingar."

„Elli qta og Bjarki Baldvins taka við liðinu til bráðabirgða hið minnsta, spurning hvort Völsungar finni reynslumeiri þjálfara til þess að sigla þennan ólgusjó með liðið í gegnum Lengjudeildina."

„Völsungar þurfa baráttu, gleði og hjarta í sinn leik til þess að djöflast eitthvað áfram í deildinni, og ætli það sé ekki bara návæmlega það sem Elfar Árni og Bjarki Baldvins geta fengið fram hjá þessum mörgu ungu og uppöldu Völsungsstrákum í bland við erlenda leikmenn."

Lykilmenn: Arnar Pálmi Kristjánsson og Elfar Árni Aðalsteinsson
Arnar Pálmi var einn besti vinstri bakvörður Lengjudeildarinnar á síðasta tímabili og var í raun óheppinn að komast ekki í lið ársins. Hann er fyrirliði Völsungs og gífurlega mikilvægur í baráttuna sem er framundan. Elfar Árni er þá algjör reynslubolti sem getur skorað mikilvæg mörk fyrir Húsvíkinga. Hann sneri aftur heim fyrir síðasta tímabil og skoraði þá sjö mörk í 20 leikjum í Lengjudeildinni. Hann er í dag spilandi þjálfari og spurning hvernig það gengur upp.

Gaman að fylgjast með: Andri V. Bergmann Steingrímsson
Yngsti bróðirinn í hinni frægu Bergmann fótboltafjölskyldu. Strákur sem er fæddur 2008 og kemur til með að fá hlutverk í liðinu hjá Völsungi í sumar. Hann var í treyju númer 10 hjá Völsungi í bikarleik á dögunum og spurning hvort hann muni sýna einhverja takta í líkingu við Hallgrím Mar, bróður sinn, í sumar.

Komnir:
Jeffrey Baltus frá Nepal
Modoumatarr Mbye frá Svíþjóð
Juan Guardia frá Þór
Davíð Leó Lund frá Tindastóli (var á láni)
Ýmir Hjálmsson frá Njarðvík
Javon Jerrod Sample frá Dalvík

Farnir:
Jakob Héðinn Róbertsson í KA
Bjarki Baldvinsson hættur
Elvar Baldvinsson í Þór
Ívar Arnbro Þórhallsson í KA (var á láni)
Ismael Salmi Yagoub til Víkings Ó.f
Sergio Parla Garcia til Spánar
Pétur Orri Arnarson í Þór (var á láni)
Ólafur Jóhann Steingrímsson í Magna
Rafnar Máni Gunnarsson hættur
Einar Ísfjörð Sigurpálsson í Tindastól
Aron Bjarki Jósepsson í KV



Fyrstu þrír leikir Völsungs:
25. apríl, Völsungur - Leiknir R. (GPG völlurinn)
1. maí, Afturelding - Völsungur (Malbikstöðin að Varmá)
9. maí, Völsungur - Þróttur R. (GPG völlurinn)