2. deild: Hafnfirðingar skoruðu fjögur í Garði

Víðir Garði tók á móti Haukum í fyrsta leik tólftu umferðar í 2. deild karla og úr varð skemmtilegur slagur.

Uros Jemovic tók forystuna fyrir heimamenn í fyrri hálfleik en Fannar Óli Friðleifsson og Magnús Ingi Halldórsson snéru stöðunni við með mörkum eftir fyrirgjafir frá hægri kanti. Mögulegt er að Dominic Lee Briggs hafi skorað opnunarmark leiksins en upplýsingar frá KSÍ og Víði stangast á.

Magnús Ingi tvöfaldaði forystu Hauka í síðari hálfleik þegar hann vann boltann hátt uppi á vellinum og skoraði auðvelt mark.

Paolo Gratton minnkaði muninn aftur niður í eitt mark á 72. mínútu og var lokakaflinn spennandi allt þar til Alexander Aron Tómasson innsiglaði sigur gestanna úr Hafnarfirði.

Lokatölur 2-4 og eru Haukar með 23 stig í harðri toppbaráttu. Þeir eru þremur stigum á eftir toppliði Ægis sem á leik til góða.

Víðir vermir áfram botnsæti deildarinnar með 8 stig. Garðsmenn hafa verið óheppnir í stigasöfnun og þurfa að snúa slæmu gengi við, en þetta var fimmti tapleikur liðsins í röð í deildinni.