Lamdi dómarann í góðgerðarleik

Roman Shirokov, fyrrum landsliðsmaður Rússlands, missti algjörlega stjórn á sér þegar hann spilaði góðgerðarleik í Moskvu. Ýmsir einstaklingar sem eru þekktir í Rússlandi léku leikinn.

Shirokov, sem er fyrrum leikmaður Zenit og Spartak Moskvu, lék 57 landsleiki fyrir Rússa á árunum 2008 - 2016.

Hann brjálaðist eftir að hafa ekki fengið vítaspyrnu í umræddum góðgerðarleik og lamdi dómarann, Nikita Danchenko, eins og sjá má á myndbandinu hér að neðan.

Danchenko hyggst kæra árásina til lögreglu en segist óttast að dómaraferli sínum sé lokið því Shirokov sé með svo sterk sambönd.

Shirokov er 39 ára og hefur starfað sem sparkspekingur í rússneska sjónvarpinu en hefur verið leystur frá þeim störfum tímabundið eftir ofbeldisverkið.

Hann virðist ekki mjög hrifinn af dómurum en hann var dæmdur í bann árið 2013 fyrir að kalla dómara trúð.