„Algjörlega galið að hún sé enn inn á vellinum"

Það var athyglisvert atvik í fyrri hálfleiknum þar sem Agla María Albertsdóttir, fyrirliði Breiðabliks, sparkaði laust aftan í Emmu Steinsen Jónsdóttur eftir að hún braut á henni.

Sérfræðingar RÚV, Harpa Þorsteinsdóttir og Ásgerður Stefanía Baldursdóttir, voru hissa á því að dómarinn, Jóhann Ingi Jónsson, hefði ekki spjaldað Öglu Maríu í þessu tilviki og jafnvel gefið henni rautt spjald.

„Mér finnst það alveg merkilegt að hvorki dómarinn né fjórði dómarinn hafi stigið þarna inn í," sagði Harpa. „Þau eiginlega brosa af atvikinu og halda áfram. Þetta er mjög áhugaverð dómgæsla."

„Þetta er bara galið. Fjórði dómarinn á líka að sjá þetta. Hún sparkar í bakið á Emmu Steinsen og það er algjörlega galið að hún sé enn inn á vellinum," sagði Adda.

„Við sáum á heimsmeistaramótinu svipað atvik með Lauren James og hún er í tveggja leikja banni," sagði Helga Margrét Höskuldsdóttir, sem er að stýra umræðunum.

Seinni hálfleikurinn var að hefjast á Laugardalsvelli en hægt er að fylgjast með í beinni textalýsingu hér á Fótbolta.net.