Þriggja hesta kapphlaup um formannsstólinn - Guðni vann kosningu lesenda

Ársþing KSÍ verður haldið í Íþróttamiðstöð Fram í Úlfarsárdal laugardaginn 24. febrúar.

Vanda Sigurgeirsdóttir býður sig ekki fram til áframhaldandi formennsku. Þrjú framboð í formannsstólinn bárust áður en frestur rann út um helgina.

Guðni Bergsson, Vignir Már Þormóðsson og Þorvaldur Örlygsson keppast um formannsembættið.

Þegar kosið verður á ársþinginu þarf að fá hreinan meirihluta. Ef enginn fær yfir 50% fylgi verður aftur kosið milli þeirra tveggja sem flest atkvæði fengu.

Guðni Bergsson hefur mest fylgi meðal lesenda Fótbolta.net samkvæmt niðurstöðu í skoðanakönnun sem var á forsíðu. Það eru þó félögin í landinu sem eru með atkvæðisrétt og alls kyns pólitík í gangi bak við tjöldin.

Guðni, Vignir og Þorvaldur voru gestir í útvarpsþættinum Fótbolti.net á X977 síðasta laugardag og ræddu þar um stærstu málin í baráttunni.