Gunnar Guðmundsson, þjálfari Þróttar R., fór í viðtal eftir jafntefli við Magna í fallbaráttuslag í dag.
Þar ræddi hann meðal annars um Dion Acoff, einn af mikilvægustu leikmönnum liðsins, sem meiddist í sigri gegn Vestra fyrir viku síðan.
Orðrómur var uppi um að Dion yrði frá út tímabilið en Gunni segir ekkert til í því.
„Þetta er bara smávægileg tognun þannig ég geri ráð fyrir honum í næstu viku. Ég veit ekki hvort hann nái næsta leik en hann ætti að vera klár í leik eftir viku," sagði Gunni.
Þróttur á heimaleik gegn Aftureldingu á miðvikudaginn áður en liðið heimsækir toppbaráttulið Keflavíkur næsta sunnudag.
Líklegt er að Tyler Brown, sem er að láni frá Crystal Palace, verði með í næsta leik gegn Aftureldingu. Hann er búinn í sóttkví og hefur náð einni æfingu með Þrótti.
„Við sáum á fyrstu æfingu að þetta er vel skólaður strákur sem kann að spila fótbolta. Hann þarf að koma sér aðeins betur í gírinn bara."
Þróttur er einu stigi fyrir ofan fallsæti sem stendur, með 12 stig eftir 15 umferðir.
Sjá viðtalið í heild.
Athugasemdir