Ekki á förum frá Bayern - „Alltaf gaman þegar maður er orðaður við önnur félög"

Glódís var til viðtals í dag fyrir landsleikinn gegn Finnlandi á morgun. Viðtalið er í lengri kantinum og má sjá það í heild sinni í spilaranum efst.

Glódís var spurð út í komandi tímabil hvort að markmiðið hjá Bayern væri að taka þrennuna; þýsku deildina, bikarinn og Meistaradeildina.

„Það er náttúrulega draumurinn, en það er rosalega erfitt, mikið af góðum liðum í Evrópu og mikil samkeppni í Þýskalandi líka. En það er klárlega það sem mann langar að gera."

En eru einhverjar líkur á að hún fari frá Bayern?

„Nei, það eru engar líkur á því," sagði Glódís og brosti. „Það er alltaf gaman þegar maður er orðaður við önnur félög eða einhver heldur að einhver hafi áhuga. Ég er rosalega sátt hjá Bayern og er í flottu hlutverki þar."

Hún kom aðeins inn á Arsenal fyrr í viðtalinu þar sem spurt var út í Meistaradeildina. Arsenal sló Bayern út með því að vinna seinni leikinn 2-0 eftir 1-0 sigur Bayern í fyrri leiknum. Voru það vonbrigði?

„Já, mér fannst það klárlega. Við fórum inn í seinni leikinn á móti Arsenal í góðri stöðu og mér fannst að við hefðum átt að klára þann leik betur. Við spiluðum mjög slakan leik fannst mér, frá A-Ö. Það var svolítið svekkjandi en að sama skapi lentum við í rosalega miklum meiðslum og við vorum með rosalega þreytt lið. Allir leikmennirnir inn á voru búnir að spila allar mínúturnar síðan um jólin. Andlega og líkamlega var komin mikil þreyta. Mér finnst það samt engin afsökun, við vorum í góðri stöðu og hefðum átt að klára þetta," sagði Glódís.