Lengjudeildin: Þróttur tapaði óvænt og Völsungur vann botnslaginn

Grindvíkingar komust yfir gegn Þrótti á 19. mínútu. Arnar Breki Gunnarsson var þá að spila sinn fyrsta leik í byrjunarliðinu, slapp í gegn og lagði boltann fram hjá Þórhalli Ísaki Guðmundssyni.

Þróttarar voru sterkari eftir markið og þurftu Grindvíkingar tvívegis að bjarga á marklínu áður en fyrri hálfleikurinn var úti.

Heimamenn jöfnuðu snemma í síðari hálfleik þegar þeir fengu vítaspyrnu. Kári Kristjánsson fór á punktinn og skoraði af öryggi.

Það voru hins vegar Grindvíkingar sem stálu öllum stigunum undir lokin. Rúnar Ingi þræddi boltann í gegnum vörn Þróttar og á Heiðar Snæ Ragnarsson sem kláraði færið frábærlega.

Óvæntur en frábær 2-1 sigur hjá Grindavík sem er í níunda sæti með 20 stig. Þróttur er áfram í öðru sæti með 34 stig.

Stórbrotið sigurmark á Ísafirði

Vestri marði 1-0 sigur á ÍR á Kerecis-vellinum á Ísafirði.

Fyrri hálfleikurinn var tíðindalítill en það lifnaði yfir leiknum eftir hlé.

Gunnar Jónas Hauksson komst í góða stöðu fyrir Vestra án þess að ná að nýta hana. Hinum megin átti Orri Bjarkason skot í þverslána.

Sigurmarkið kom þegar um tuttugu mínútur voru eftir og var það af dýrari gerðinni. Ibrahima Balde skoraði þá með glæsilegri bakfallsspyrnu eftir hornspyrnu Guðmundar Arnars Svavarssonar.

Vestri fékk færi til að gera endanlega út um leikinn. Þórður Gunnar Hafþórsson skaut í stöng og Gunnar Jónas setti boltann yfir úr ákjósanlegu færi.

Slæm færanýting kom þó ekki að sök og Vestramenn fögnuðu dýrmætum sigri.

Vestri er í sjöunda sæti með 24 stig. ÍR situr í því tíunda með 19 stig, aðeins tveimur stigum fyrir ofan fallsæti.

Dagbjartur sá um botnslaginn

Völsungur vann mikilvægan 2-0 sigur á Ægi í botnslagnum.

Sigurinn var verðskuldaður hjá Húsvíkingum sem komust yfir á 26. mínútu. Dagbjartur Búi Davíðsson fékk boltann vinstra megin, keyrði inn á miðjuna og lét vaða. Skotið fór af varnarmanni og endaði niðri í nærhorninu.

Dagbjartur gerði síðan endanlega út um leikinn á 63. mínútu. Ægismenn hreinsuðu hornspyrnu út í teiginn þar sem hann tók boltann niður og þrumaði honum í fjærhornið.

Öruggur sigur hjá Völsungi sem heldur áfram að berjast fyrir sæti sínu í deildinni. Liðið er í næstneðsta sæti með 17 stig, tveimur stigum frá öruggu sæti.

Ægir situr á botninum með átta stig og stefnir hraðbyri niður um deild.

Vestri 1 - 0 ÍR
1-0 Ibrahima Balde ('73 )
Lestu um leikinn

Grindavík 2 - 1 Þróttur R.
1-0 Arnar Breki Gunnarsson ('19 )
1-1 Kári Kristjánsson ('47 , víti)
2-1 Heiðar Snær Ragnarsson ('83 )
Rautt spjald: Friðrik Franz Guðmundsson, Grindavík ('86) Lestu um leikinn

Ægir 0 - 2 Völsungur
0-1 Dagbjartur Búi Davíðsson ('26 )
0-2 Dagbjartur Búi Davíðsson ('63 )
Lestu um leikinn