Umdeildur heimsmeistari tekur við landsliði Marokkó (Staðfest)

Vilda þjálfaði spænska kvennalandsliðið frá 2015 áður en hann var rekinn eftir að hafa unnið HM í Ástralíu og Nýja-Sjálandi í ágúst.

Þjálfarinn þótti afar umdeildur í starfi sínu hjá kvennalandsliðinu, en á síðasta ári ákváðu fimmtán leikmenn landsliðsins að sniðganga það vegna Vilda.

Vilda var sakaður um að beita þær óásættanlegri meðferð og var leikstíll hans einnig gagnrýndur. Eitrað andrúmsloft skapaðist í kringum liðið, en aðeins þrjár af þessum fimmtán leikmönnum sneru aftur í landsliðið fyrir HM.

Liðið vann England, 1-0, í úrslitum mótsins og fagnaði heimsmeistaratitilinum, en eftir leikinn átti sér stað hneyksli sem átti eftir að draga dilk á eftir sér. Forseti spænska fótboltasambandsins, Luis Rubiales, smellti þá rembingskossi á Jennu Hermoso, leikmann landsliðsins, gegn hennar vilja.

Rubiales neitaði að segja af sér fyrstu vikurnar, en lét undan á endanum og yfirgaf sambandið. Vilda var einn af þeim sem var látinn fara í kjölfarið, en hann telur að það hafi verið gert vegna vinskapar síns við Rubiales.

Vilda var ekki lengi að finna sér nýtt starf, en í dag var hann ráðinn nýr þjálfari kvennalandsliðs Marokkó.

Marokkó komst í fyrsta sinn á HM í sumar og fór alla leið í 16-liða úrslit.

Afríkumótið verður haldið í Marokkó á næsta ári, en þjóðin hafnaði í öðru sæti á síðasta móti.