Frábært að vera í KR
Hvernig horfa þessi fimm tímabil við Finni og hvað tekur hann með sér frá tímanum?

„Mér fannst alveg frábært að vera þarna, tímabilin voru mismunandi. Ég kem í KR þegar Bjarni Guðjónsson og Gummi Ben eru að þjálfa, Bjarni var rúmt hálft tímabil sem þjálfari. Það leiðinlega við það tímabil var það að bæði leikmannahópurinn og þjálfarateymið var frábært en við náum ekki að sýna okkar rétta andlit fyrr en seinni hlutann. Þá tekur Willum við og við náum Evrópusæti. Willum er svo með okkur 2017 tímabilið, ég er rosalega þakklátur fyrir að hafa fengið að hafa verið undir stjórn Willums, það tímabil missum við af Evrópusæti og í kjölfarið tekur Rúni við liðinu," sagði Finnur.

„Ég þekkti Rúna frá tíma mínum í Lilleström, hann sótti mig þangað þar sem ég spilaði í eitt ár. Rúni tekur Bjarna með sér í teymi og þeir tveir eru mjög góðir saman, vega hvorn annan upp, ná vel til hópsins og eru flottir þjálfarar sem hafa stýrt liðinu undanfarin ár. Þegar ég svo horfi á hópinn þá hefur leikmannahópurinn og klefinn alltaf verið frábær, samsetningin á hópnum hefur verið mjög skemmtileg og ég fílaði alla þá stemningu sem hefur verið í kringum liðið og inn í hópnum allan minn tíma hjá KR."

Íslandsmeistaratitilinn hápunkturinn
Hverjir eru hápunktarnir frá tímanum í KR og hvað annað er eftirminnilegast?

„Það er auðvelt og augljóst að segja Íslandsmeistaratitilinn í KR hafi verið frábær og það sumar gekk allt upp hjá liðinu. Við tókum titilinn mjög sannfærandi og unnum marga sterka sigra."

„Við vorum rosalega öflugt lið og það var gaman að vera hluti af því. Annað eftirminnilegt augnablik er þegar við náum Evrópusæti 2016 alveg í restina. Það var súrsætt tímabil því framan af gekk ekkert þrátt fyrir að við vorum með sterkt lið. Í seinni umferðinni, ef mig misminnir ekki, þá varla töpuðum við leik, spiluðum rosalega skemmtilegan fótbolta og árangursríkan sem skilaði sér í því að við náðum Evrópusæti."

Hefði viljað spila gegn Celtic undir öðrum kringumstæðum
Finnur hélt áfram og kom inn á viðureign Celtic og KR á Celtic Park í ágúst.

„Svo er hægt að tala um annað eftirminnilegt augnablik, eitt sem gerðist á þessari leiktíð. Evrópuleikurinn gegn Celtic í sumar. Það var gaman að hafa spilað á móti þeim en það var undir mjög skrítnum aðstæðum og það eitt og sér mun maður hugsa sterkt til þar sem aðstæðurnar og leikurinn var mjög skrítinn. Maður hefði viljað spila á Celtic Park undir allt öðrum kringumstæðum en rosa gaman að koma á völlinn og spila á móti Celtic, engin spurning. Önnur eftirminnileg Evrópuferð er þegar við spiluðum í Ísrael, það var skemmtilegt ferðalag, krefjandi leikur en gaman að koma þangað."

„Heilt yfir er ég rosalega þakklátur að hafa fengið að spila með KR og ekki auðveld ákvörðun að fara þaðan. Rosalega gott fólk sem vinnur þar og ég hef ekkert nema gott þaðan."

Verður ekki í stúkunni á öllum leikjum
Er Finnur orðinn það mikilll KR-ingur að hann verði í stúkunni og haldi með KR í öllum leikjum nema gegn Breiðabliki?

„Ég óska drengjunum í KR góðs gengis og allt það,“ sagði Finnur og hló. „Ég ætla nú ekkert að vera í stúkunni á öllum leikjum að styðja í hvert skipti sem ég er ekki að keppa en ég hugsa vel til strákanna að sjálfsögðu."

Ýmislegt sem gekk á
Alls kyns sögur hafa flogið um fjárhagsstöðu KR, liðið er stórt félag og er oft í umræðunni. Pablo Punyed t.a.m. kom inn á vandamál KR í viðtali á dögunum.

Eru fjárhagsvandræði KR einhver hluti af ástæðunni fyrir því að Finnur ákvað að halda annað á þessum tímapunkti?

„Nei í raun og veru ekki, það var ekki það sem varð til þess að ég ákvað að fara," sagði Finnur. En tók hann eftir því að sú umræða hafði áhrif á hópinni?

„Ég veit ekki hvernig staðið var af hlutunum gagnvart einstaka leikmönnum hvað varðar fjármálin. En það var ýmislegt annað sem gekk á sem snýr að hópnum. Ferðalagið í kringum Evrópuleikinn og allt það. Það var ýmislegt sem dundi á utan frá en það var sama hvað það var, hópurinn stóð alltaf þéttur saman."

Finnur hafði áður komið inn á Celtic-leikinn og núna kemur hann að ferðalaginu. Hlé hafði verið á deildinni hér heima vegna bylgju kórónaveirusmita og mikið var rætt um hvort leikmenn KR þyrftu að fara í sóttkví við heimkomu.

„Þetta hafði held ég meiri áhrif en menn gera sér grein fyrir. Það var búið að búa til eitthvað stress að ná fyrir miðnætti heim, þetta var einhvern veginn allt í lausu lofti bæði fyrir leikinn og eftir leikinn. Stjórnarmenn KR fengu aldrei nein svör og síðan var veitt einhver vinnusóttkví og ég held að þetta hafi ekki verið þægilegt fyrir neinn."

„Þetta bara gekk ekki, því miður"
Finnur var spurður nánar út í tímabilið í ár. KR missti af Evrópusæti eftir að hafa orðið Íslandsmeistari á síðustu leiktíð. Hvers vegna gekk ekki betur á liðinni leiktíð?

„Það eru margar ástæður fyrir því og erfitt að setja einhverja eina ástæðu fram þegar spurt er af hverju gekk ekki eins vel og í fyrra. Þegar ég horfi á tímabilið í fyrra þá er þannig bragur og andi í kringum allt að allt gengur upp. Það skiptir ekki máli hvernig við spilum eða á móti hverjum það gekk allt upp. Það var svolítið hin hliðin á peningnum í ár. Við vorum að missa stig þegar við hefðum ekki átt að gera það, fá á okkur óþarfa mark og fá færi á okkur sem enduðu á þann veg sem þau hefðu ekki átt að enda."

„Mér finnst vera rosalega miklar andstæður í þessum tímabilum. Það er krefjandi að verja Íslandsmeistaratitil og þegar það fer að líða á þá minnkar í hópnum hjá okkur þegar horft er í meiðsli og annað. Það er rosalega margt sem spilar inn í en það var ekkert kæruleysi í gangi eða slíkt, við vorum mjög meðvitaðir um það sem okkur langaði að gera á þessu tímabili. Það bara gekk ekki, því miður. Við fundum ekki alveg þeim takti sem við náðum upp í fyrra."

Þurfti að spenna saman rasskinnarnar
Þegar Finnur lítur á eigin frammistöðu er hann sáttur með hana?

„Já, ég er það. Ég var svo sem ekkert í liðinu í öllum leikjum en allt frá undirbúningstímabilinu og fram í síðasta leik var ég sáttur með mína frammistöðu."

Finnur sagði hér fyrir ofan að tímabilið í fyrra hafi verið frábært. Hann segir þó að hjá sér persónulega hafi árið í fyrra verið meira bras.

„Ég meiðist að ég held í fimmtu umferð í fyrra á gervigrasinu í Laugardalnum og er frá í átta vikur, mitt lengsta tímabil af meiðslum. Ég náði mér einhvern veginn ekki á strik eftir það. Í þeim leikjum sem ég spilaði, ef ég segi það hreint út, var ég ekki upp á mitt besta."

„Ég var því meðvitaður um það frá fyrstu æfingu síðasta haust að ég þyrfti að spenna saman rasskinnarnar, ég þurfti að sækja mér sæti í liðinu í sumar. Ég tel að það hafi tekist ágætlega og ég er sáttur með spilamennskuna í sumar. Ég byrjaði ekki alla leiki, við vorum með rosalega sterkan hóp og samkeppnin var mikil sem er hollt. Ég er ánægður með hvernig ég persónulega brást við síðasta tímabil eftir að hafa ekki náð mér fullkomlega á strik."

Verkefnið að koma sér í liðið
Finnur fékk mikið lof fyrir frammistöðu sína gegn Breiðabliki á Meistaravöllum, KR vann leikinn 3-1. Fann Finnur fyrir einhverju sérstöku í kringum þann leik?

„Ef ég man rétt þá var leikurinn á móti Víkingi á undan þar sem þeir fengu eftirminnilega þrjú rauð spjöld. Ég kom inn á í þeim leik og það gekk vel. Ég er svo í liðinu á móti Blikunum og ég kom nokkuð ferskur inn í þann leik. Það var meira verkefnið að tryggja mér sæti í liðinu sem keyrði mig í liðinu sem keyrði mig áfram í þeim leik. Við spiluðum af mikilli ákefð í þeim leik og það hentaði mér mjög vel. Ég man að sá leikur gekk mjög en það var ekkert sérstakt í kringum þann leik nema að koma sér í liðið."

Eitthvað 'euphoria' dæmi í gangi
Síðasta helgin í ágúst árið 2018 var eftirminnileg fyrir Finn. Hann skoraði sitt fyrsta deildarmark á ferlinum og eignaðist strák. Hvernig var þessi helgi?

„Þetta mark var á móti ÍBV. Það var rosalega skemmtilegt að skora það ofan á annars viðburðaríka helgi. Það var eitthvað euphoria dæmi í gangi þá og fyndið að þetta lendi svona, tilviljun eða ekki. Það gekk allt upp þessa helgi."

Væri örugglega hættur í fótbolta
Finnur, eins og segir hér að ofan, hefur einungis skorað eitt mark í deildinni á ferlinum og einungis skorað eitt mark með Breiðabliki í mótsleik, það kom í Evrópuleik. Mun hann skora sitt fyrsta deildarmark með Breiðabliki næsta sumar?

„Mitt hlutverk hefur ekki verið að skora mörk þó ég sé ekki að gera mig stikkfrí í þeim efnum. Þetta truflaði mig meira þegar ég var yngri. Tómas Þór Þórðarson spurði mig sömu spurningar fyrir einhverjum fimm, sex árum og ég svaraði þá að ég væri búinn að læra að dusta þetta af mér. Ef ég væri að hugsa um þetta daginn út og daginn inn þá væri ég örugglega hættur í fótbolta og orðinn þunglyndur. Það myndi klárlega bæta mig sem leikmann ef ég myndi fara bæta inn einhverjum mörkum en það er ekkert sem ég er að stressa mig yfir," sagði Finnur Orri að lokum.