Lestu um leikinn: Vestri 0 -  2 KA

Vestri og KA áttust við í fallbaráttuslag í eina leik dagsins í Bestu deild karla og var fyrri hálfleikurinn bragðdaufur, en gestirnir frá KA voru hættulegri.

KA fékk einu færin og sýndi Viðar Örn Kjartansson fína takta í leiknum. Hann fiskaði vítaspyrnu undir lok fyrri hálfleiks, eftir að hafa sloppið í gegn eftir flotta sendingu frá Bjarna Aðalsteinssyni.

William Eskelinen markvörður braut á Viðari og skoraði Hallgrímur Mar Steingrímsson af vítapunktinum.

Vestramenn áttu erfitt uppdráttar og náðu ekki að skapa sér færi gegn Akureyingum, sem komust nálægt því að tvöfalda forystuna í síðari hálfleik en Eskelinen sá við Sveini Margeiri Haukssyni.

Hallgrími Mar tókst að tvöfalda forystuna á 75. mínútu með snyrtilegu marki eftir sendingu frá Harley Willard, þar sem Hallgrímur þurfti að komast framhjá varnarmanni áður en hann setti boltann undir Eskelinen og í netið.

Vestramenn gerðu sig líklega til að minnka muninn á lokakaflanum en tókst ekki. Vladimir Tufegdzic átti skalla í slá undir lokin og svo datt boltinn fyrir Elmar Atla Garðarsson í dauðafæri í uppbótartíma en varnarmenn KA náðu að henda sér fyrir skot hans.

Lokatölur urðu því 0-2 og er Vestri áfram í fallsæti, með 11 stig eftir 14 umferðir.

KA fer upp um tvö sæti með þessum sigri og situr nú í 8. sæti með 15 stig.