Lestu um leikinn: Stjarnan 2 -  0 FH

„Þetta er alveg frábært, við erum búnir að stefna að því í allt sumar að komast í bikarúrslitin. Það gefur okkur mikla tilhlökkun fyrir restina af tímabilinu."

Guðjón skoraði og lagði upp í kvöld og þegar undirritaður spurði hvort honum hefði ekki verið sama hver skoraði svo lengi sem þeir unnu sagði Guðjón að það væri ekki rétt því hann er framherji sem elskar að skora mörk.

„Ég segi það nú ekki alveg, ég er ekki búinn að skora nógu mikið í sumar og það er alltaf gaman fyrir senter að skora. Það gefur mér sjálfstraust og ég ætla ekkert að ljúga því að ég hafði mjög gaman að því."

Stjarnan er í dauðafæri á titli í sumar, eru í hörku toppbaráttu í deildinni og komnir í úrslitaleik Mjólkurbikarsins. Guðjón segir það algjörlega undir þeim komið að klára þessa leiki sem eftir eru.

„Við erum búnir að koma okkur í ansi vænlega stöðu á báðum stöðum. Þetta er undir okkur komið og ef við klárum þá leiki sem eru eftir og standa uppi með eina dollu þegar sumarið er á enda."

Guðjóni fannst þeir hafa leikinn í höndum sér allan leikinn og sagði liðið vera gríðarlega skipulagt í sumar og verði bara að halda því áfram og þá standa þeir uppi með titil í haust.

„Við vorum bara solid varnarlega og héldum skipulagi vel, mér fannst við alltaf hafa tökin þótt þeir hafi verið meira með boltann á tímabili. Þegar við erum svona skipulagðir er erfitt að komast í gegnum okkur og við verðum bara að halda svona áfram."