Alves er 38 ára gamall og án félags sem stendur eftir að hann gerði samkomulag við brasilíska félagið Sao Paulo um að rifta samningnum.

Brasilíumaðurinn hefur þegar greint frá því að honum liggur ekkert á að semja við nýtt félag en hann vill þó komast aftur í Evrópuboltann.

Samkvæmt Onze þá hefur Alves haft samband við Barcelona og boðist til að spila fyrir félagið. Alves spilaði með félaginu frá 2008 til 2016 og vann 23 bikara með liðinu.

Hann fer ekki fram á háar launakröfur og yrði það ekkert vandamál en félagið á þó eftir að taka ákvörðun.

Alves ætlar að halda sér í standi fram að HM sem fer fram í Katar á næsta ári. Þessi magnaði leikmaður er með 43 titla í safninu og er sá sigursælasti í sögunni.