England: De Bruyne potturinn og pannan í sigri á Arsenal

Manchester City kom í heimsókn á Emirates í London í dag. Heimamenn í Arsenal byrjuðu á því að sækja en liðið fékk kjaftshögg þegar Kevin de Bruyne skoraði stórkostlegt mark eftir sendingu frá Gabriel Jesus á 2. mínútu leiksins.

Jesus sendi boltann út á de Bruyne sem smellti boltanum á lofti upp í þaknetið. Þrettán mínútum seinna lagði de Bruyne upp mark fyrir Raheem Sterling og staðan orðin slæm fyrir Arsenal.

Vont versnaði á 40. mínútu þegar de Bruyne skoraði annað mark sitt í leiknum, nú eftir sendingu frá Phil Foden. Leikmenn Arsenal voru einungis tíu inn á vellinum þar sem Sead Kolasinac meiddist, Bukayo Saka var ekki tilbúinn að koma inn á sem varamaður.

Mörkin urðu ekki fleiri í seinni hálfleik og 0-3 útisigur City staðreynd.